Taorian’ny fivoriambe tsy ara-potoana nataon’ny sendikàn’ny mpiasan’ny fandintseranana, Sempidou. Nanao fanambarana ho an’ny rehetra izy ireo, omaly, tetsy Ankadifotsy. Nisongadina tao anatin’izany ny filazana fa hanao fitokonana faobe mandritra ny telo andro ny mpiasan’ny fandintseranana rehetra manerana an’i Madagasikara.
Araka ny fanazavana nataon’izy ireo, mbola misy ihany ny tolotra hatao ho an’ny fandraisana ny fitaovana ara-pitsaboana sy ny fanafody hatao amin’ny hopitaly.
Tsy tafiditra anatin’ity tolotra ity kosa ny fitaovan’ny mpitandro filaminana, raha ny filazan’ izy ireo. « Tsy anatin’ ity « service minimum” ity ny fitaovan’ ny mpitandro filaminana satria raha ny zavatra hita ankehitriny, famonoana olona no ataon’izy ireo eto amin’ny firenena, amin’izao zava-misy izao », hoy i Herizo Andrianavalona Ramanambola, filohan’ ny sendikà Sempidou.
Nomarihin’izy ireo fa hanomboka ny alatsinainy ho avy izao, ny fitokonana ary manome fe-potoana ny mpitantana ny firenena izy ireo, hihaino ny vahoaka izay mitaraina amin’ izao zava-misy izao. Notsiahiviny ihany fa raha tsy mbola misy ny fandraisana fanapahan-kevitra, hitohy ny fitokonana faobe, aorian’io telo andro io.
F.R
French