Natao ny 4 hatramin’ny 10 septambra teo, tany Alger, ny Foara ara-barotra ho an’ny afrikanina (IATF 2025) andiany fahefatra. Anisan’ny hetsika ara-toekarena lehibe indrindra aty Afrika ity natao ity.
Nahavory mpitsidika maherin’ny 35 000 avy any amin’ny firenena miisa 80 sy orinasa mpandray anjara maherin’ny 2 000 ny “IATF”. Nanohana ny foara ny Banky afrikanina ho an’ny fampandrosoana (Bad), ao anatin’ny Tetikasa fanajariana ny tandavanala sy fanamorana ny varotra (PACFC). Hita tao amin’ ny tranohevan’i Madagasikara, Pavillon Rhumel Africain, ny rafi-panjakana sy ny sehatra tsy miankina. Nentina nampiroboroboana ny Varavarana ho an’ny fampahalalam-baovao ara-barotra eto Madagasikara (PICM). Teny filamatra noraisina ny « hita amin’ny fikitihana kely fotsiny ny mahakasika ny varotra rehetra ! ». Nanomboka tamin’ny avrily 2024 ny PICM, fitaovana niomerika stratejika, manangona sy manamora ny antontam-baovao rehetra ara-barotra eto an-toerana sy ny iraisam-pirenena.
Fifanakalozana malalaka Zlecaf
Nanamafisan’i Madagasikara ny fisiany ara-toekarena aty Afrika ny PICM. Hanamorana ny fidirana ao anatin’ny Faritra ifanakalozana malalaka (Zlecaf). Nilaza ny talen’ny Varotra ivelany ao amin’ny minisitera, i Joeline Hariniaina Modeste, fa « tsy azo ialana, ankehitriny, ny fampiasana ny niomerika. Fanoitra lehibe hampahafantarana an’i Madagasikara aty Afrika. Ho mora amin’i Afrika ny hifanakalo ara-barotra amin’i Madagasikara amin’ny fanafarana sy fanondranana entana any ivelany ».
Nasongadin’ny tale jeneralin’ny Varotra, Razanakoto Isidore, fa « fanehoana fa mpisehatra tsy azo ihodivirana i Madagasikara aty Afrika, amin’ny alalan’ny PICM. Nanehoana ny fahavononantsika hiditra ao amin’ny tsena afrikanina ny fandraisana anjara tany amin’ny IATF 2025”.
Njaka
Andriantefiarinesy
French