Araka ny vaovao hita tao amin’ny pejin’ny minisiteran’ny Tanora sy ny Fanatanjahantena (MJS), omaly, nivaly ny fangatahana nataon’ireo tanora mpitondra tetikasa fampandrosoana tamin’ny Fandaharanasa fampiroboroboana ny Fandraharahan’ny Tanora (PPEJ). Miisa folo mianadahy izy ireo, efatra vehivavy ary lehilahy ny enina, nahazo izany fanohanana ara-bola izany. Famatsiam-bola mitentina 29 180 euros na manodidina ny 151 736 000 Ariary, avy amin’ny Confejes 2025 na « Conférence des ministres de la jeunesse et des sports de la francophonie » izy ity.
Avy amin’ny faritra valo eto Madagasikara izy ireo: Analamanga, Analanjirofo, Atsinanana, Atsimo Andrefana, Boeny, Ihorombe, Fitovinany ary Vakinankaratra. Ny minisitra teo aloha, Moustapha Abdulah Marson, no nandefa hafatra feno firariantsoa sy fanentanana ho azy ireo, mba hahavita soa aman-tsara ny tetikasany sy hahaleo tena amin’ny sehatry ny fandraharahana ataony.
Iangaviana moa ireo tanora tafiditra ao amin’ny lisitra ofisialy mba hanatona ny Tale misahana ny fampiroboroboana ny fandraharahan’ny tanora eo anivon’ny minisitera, amin’ny herinandro ambony, mba handraisana ny toromarika sy ny antontan-taratasy rehetra ilaina amin’ny famatsiam-bola.
Fitia Randria
French