Araka ny vaovao farany, nametra-pialana ny tale jeneralin’ny Madagascar Airlines, omaly hariva. Tsiahivina fa ny maraina no nangataka ny fametraham-pialany ny sendikan’ny mpiasa eo anivon’ny orinasa Madagascar Airlines, tetsy Ivato. Omaly maraina, nangataka ny fialan’ny tale jeneralin’ny zotram-piaramanidina Madagascar Airlines, i Thierry de Bailleul, ny mpiasa. Nilaza moa izy ireo fa tsy tokony ho izy irery ihany no miala fa manaraka azy koa ireo vahiny mpanolotsaina rehetra izay miara-miasa aminy anatin’ity vondrom-piaramanidina malagasy ity. Ny fitantanana foibe no hisahana ny fampandehan-draharaha amin’izao fametraham-pialany izao.
Tsara ny mampahatsiahy fa nanomboka ny taona 2022 no nitantana ity kaompaniam-pitaterana ana habakabaka malagasy ity i Thierry de Bailleul ary nohavaozina ny volana aogositra lasa teo izany, saingy izao nametra-pialana izao ny tenany.
Fialan’ny DG ny Jirama
Ankoatra izany, mangataka ny hanesorana ny tale jeneralin’ny Jirama, Ron Weis, ihany koa ny sendikan’ny mpiasan’ny Jirama. Maro ireo fitakian’ny mpiasa no tsy voavaliny. Anisan’izany, ireo mpiasan’ny Jirama notazonina any am-ponja. Eo koa ny tsy fanajana ny zon’ny mpiasa.
Fitia Randria
French