Mitentina 3 194,3 tapitrisa dolara ny tahirim-bola ananantsika tamin’ny faran’ny volana septambra, araka ny tatitra navoakan’ny Banky Foiben’i Madagasikara (BFM) tao anatin’ny fanadihadiana ara-toekarena ataony isaky ny telo volana.
Mahavita mandrakotra ny fanafarana entana mandritra ny enim-bolana mahery (6,2), izany hoe, hatramin’ny volana marsa 2026 ity devizy ity, raha oharina ny tamin’ny taon-dasa izay misanda 2 722,4 tapitrisa dolara ka niatrehana ny fanafaran’entana nandritra ny dimy volana mahery (5,8).
Antony nahatonga ny fitomboana ny fampidirana vola vahiny amin’alalan’ireo tetikasam-pampandrosoana tanterahana eto amintsika. Nihatsara ny tahirim-bolan’i Madagasikara nanomboka ny taona 2023, tamin’ny vanim-potoana voalaza etsy ambony. Mandray anjara amin’ny fampidirana vola vahiny ihany koa ny fanondranana ny hrena an-kibon’ny tany sy ny vokatr’ireo orinasa afakaba.
Nihena 10,5%
Na izany, tsy mitsaha-mitotongana ny tahan’ny fanondranan’entana nataontsika nandritra ny telo volana fahatelo ny taona 2025, izay tafidina hatrany amin’ny 10,5%. Voalaza tao anatin’ny tarehimariky ny BFM fa nisanda 1 772,5 tapitrisa dolara ny fanondranana nataon’i Madagasikara tamin’io vanim-potoana io. Niiba tanteraka izany raha oharina ny tamin’ny telo volana fahatelo ny taona 2023, izay manodidina ny 2 418,3 tapitrisa dolara, ary mbola nihena izany ny tamin’ny taon-dasa nandritra io vanim-potoana io ihany, izay nisanda 1 980,4 tapitrisa dolara. Voakasika’izany ny lavanila izay tafidina hatrany amin’ny 47%. Ankoatra izany, nihena 45,9 % ny vola azo tamin’ny fanondranana avy jirofo. Nidina hatrany amin’ny 16,2% ihany ny nikela naondran’i Madagasikara noho ny fihenan’ny vidiny teo amin’ny 12,3%.
Henintsoa
French