“Misy zavatra hita sy tsapa ary fantatra fa tsy manaraka ny lalàna velona iainana eto amin’ny tany sy ny fanjakana ny fisamborana azy”. Io no fanehoan-kevitry ny lehiben’ ny fanoherana sady filoha lefitra fahafito eny anivon’ny Antenimierampirenena, ny depiote voafidy tany Ambovombe Androy tamin’ny anaran’ny Irmar, Milavonjy Andriasy Philobert, teny Tsimbazaza, omaly, momba ny fisamborana sy fanenjehana atao
amin’ny depiote voafidy tamin’ ny anaran’ny Irmar, i Sahondrarimalala Marie Michelle. Raha momba ny naha minisitra teo aloha azy ny fanenjehana : mazava ny lalàmpanorenana fa ny Fitsarana avo (HCJ) no afa-manao an’izay, raha misy taratasy fanenjehana avy amin’ny tonia voalohany mpampanoa eo anivon’ ny fitsarana tampony. Alefany eny amin’ny Antenimierampirenena; avy eo, hirosoana ny fanadihadiana, izay miafara amin’ny latsa-bato ataon’ny depiote. Tsy nisy izany. Tsy fantatra ny nahatonga ny fanenjehana.
Mazava fa manana tombon-jo parlemantera tsy azo enjehina ny depiote, izay voafaritry ny And. 73 amin’ny lalàmpanorenana. Nisy ny fanambaran’ny filohan’ny Antenimierampirenena fa nisy ny fivorian’ny birao maharitra nanapahana ny fanalana an’ izay tompon-jo parlemantera tsy azo enjehina izay. Amin’ny maha filoha lefitra fahafito azy, tsy nandre sy tsy nanatrika an’izany fivorian’ny birao maharitra izany izy. Ny fihaonany amin’ny filohan’ny Antenimierampirenena no hahazoana mijery ny tena zava-misy: iza no nangataka ny fanalana ny tombon-jo parlemantera tsy azo enjehina, iza ireo birao maharitra nivory ary oviana?
R. Nd.
French