Hotanterahina ny alahady izao, etsy amin’ny Ekar Andohalo, ny herinandro fiaraha-mivavaka, hotarihin’ny FFKM. Hatao amin’izany koa ny famindram-pitantanana sy ny fampitana hafatra ho an’ny kristianina sy ny vahoaka, indrindra ny momba ny raharaham-pirenena.
Hampahafantarin’ireo filoham-piangonana amin’io fotoana io ny ho tohin’ny fikaonandoham-pirenena, taorian’ ny nanokafana izany teny Ivato, ny 10 desambra teo. Efa nitohy tamin’ny fihaonan’ izy ireo amin’ny filoham-panjakana, ny Kly Randrianirina Michael izany taty aoriana. Nanamafy izany koa ny dinika naharitra ora maro teo amin’ izy ireo sy ny minisi-panjakana, ny Me Razafimanantsoa Hanitra, teny Andohalo, afakomaly. « Tafiditra amin’ny fandaminana eo amin’ny FFKM sy ny minisi-panjakana ary ny filoham-panjakana momba ny fikaonandoha ny dinika », hoy ny loharanom-baovao.
Etsy andaniny, efa nidina teny anivon’ny faritra ny minisi-panjakana nampahafantatra ny momba ny fikaonandoham-pirenena sy nifampidinika tamin’ireo hery samihafa tamin’ireny toerana ireny.
Tsiahivina fa anisan’ny nambaran’ny eveka mpanampy, diosezin’Antananarivo, ny Mgr Mamiarisoa Modeste, ny alahady teo, fa goavana ny asa miandry ny FFKM eto amin’ny firenena amin’izao toe-draharaha izao. Nanentana ny rehetra ny tenany
ho avy hanatrika ny fotoam-bavaka hatao eny Andohalo, ny alahady tolakandro izao. « Firenena hiarahana manana i Madagasikara ka ny rehetra no andrasana amin’ny fahavononana handray ny andraikitra tandrify azy manomboka eny ifotony », hoy izy.
Synèse R.
French