Notanana eny anivon’ny kaomisaria foibe Tsaralalàna ireo roa lahy tratra nihazona basy tsy ara-dalàna tetsy Anosizato, omaly. Tsy nahitana taratasy manamarina ny fahafahana mihazona sy mampiasa izany teny amin’izy ireo. Anton’ny fisamborana.
Nosamborin’ny polisim-pirenena avy ao amin’ ny Compagnie urbaine d’intervention (CUI) omaly, tamin’ny 11 ora atoandro, tetsy Anosizato, ny lehilahy roa,
tratra nihazona basy tsy ara-dalàna. Nanao taingin-droa tamin’ny moto scooter izy roa lahy ireo. Nirifatra tampoka sy nandeha mafy rehefa nandalo teo amin’ny polisy misahana ny fifamoivoizana eny Anosizato. Mbola nandeha nifanohitra tamin’ny lalana sady niezaka nandositra ny tetezana ihany koa izy ireo, nandritra ny sakana fanaraha-maso ny fifamoivoizana. Niteraka ahiahy ny fihetsik’izy ireo, noho izany, ka tsy maintsy nosavaina.
Nahitana basy poleta “calibre 7,67 cm” iray sy bala miisa enina tany amin’izy roa lahy rehefa nosavaina. Nitondra basy izy ireo nefa tsy nahitana taratasy ara-dalàna manamarina ny fahazoany mihazona sy mampiasa izany, raha ny vaovao voaray avy amin’ny polisim-pirenena. Tsy fantatra mazava ny antony nihazonan’izy ireo izany, raha ny fanazavana voaray.
Nahitana rongony
Ankoatra izay, mbola nahitana fonosana rongony iray sy zavatra maro hafa mampiahiahy ihany koa teny amin’izy ireo, nandritra ny fisavana. Manoloana izany, nosamborina sy natao andrimaso eny anivon’ny Kaomisaria foibe Tsaralalàna izy ireo, taorian’ izay. Natolotra ny Sampandraharaha misahana ny fanadihadiana (SUT) miatrika fanadihadiana. Atolotra ny fampanoavana ny raharaha aorian’ ny famotorana. Tafiditra ao anatin’ny ady amin’ny asan-jiolahy sy fiarovana ny vahoaka izao hetsika izao. Ahina ho mpiray tendro amin’ny fikambanan-jiolahy ireto olona voasambotra ireto. Ny tohin’ny fanadihadiana no hahafantarana ny tena zava-misy manamarina izany na tsia, ny niavian’ilay basy sy ny tanjona amin’ny fampiasana azy.
Mino
French