Manoloana ny lahatsoratra fanadihadiana lalina mitondra ny lohateny hoe : “FAMOKARANA KARBONINA : MITERAKA OLAM-PIARAHAMONINA AO IHOROMBE NY FANOMEZANA TANY HO AN’ NY TOZZI GREEN », nivoaka tato amin’ny gazety Taratra laharana faha-6277, pejy 4-5 ny 12 desambra 2024 dia milaza ny orinasa Tozzi Green fa :
- Ny isa marina an’ny hektara tantanan’ny Tozzi Green ao amin’ny faritra Ihorombe dia 6 731,5 fa tsy 11 000.
- Mahakasika ny Fangatahana voalaza ao amin’ilay lahatsoratra, tsy azo raisina ho « raharaha ara-pitsarana » izany. Ny tanjon’ny PCN dia ny fanomezana sehatra fifampiraharahana mba hahafahana mamaha ny olana ary tonga amin’ny fifanarahana.
- Tsy ampahany amin’ny karazan-kazo ampiasaina amin’ny tetikasa fambolen-kazo ny eucalyptus
Mahakasika an’io lahatsoratra io, ny Tozzi Green dia manamafy ny maha ara-dalàna tanteraka ny asany ary manazava fa ny faritra rehetra ampiasain’ny Tozzi Green dia azo tamin’ny fanajana tanteraka ny lalàna malagasy sy miaraka amin’ny fiaraha-miasa avy amin’ny Fanjakana malagasy, ary niarahana tamin’ny mponina tamin’ny alalan’ny fifampidinihana ampahibemaso maro natao niaraka tamin’ny manampahefana. Fanampin’izany, efa an-taonany maro ny orinasa no nandray anjara tamin’ny tetikasa ara-toekarena, ara-tsosialy ary ara-kolontsaina ho tombontsoan’ireo fiarahamonina eny amin’ireo faritra iasany any Madagasikara. Ohatra amin’izany ny fananganana fotodrafitrasa ho an’ny sekoly, hopitaly ary kianja filalaovana, ny famoronana fikambanana eny ifotony ary ny fanomezana fitaovana ho an’ny sekoly sy ny fanatanjahantena.
Manambara ihany koa ny orinasa fa tsy manan-kery ny fiampangana na fanondroana momba ny tsindry na fandrahonana atao amin’ny mponina eo an-toerana: tsy nisy na dia iray aza tamin’ireo solontena, mpiasa na mpiara-miasa amin’ny Tozzi Green no nanana na hanana fitondrantena mampitahotra na manesoeso olona. Mahakasika izany, tsipihina fa ny fisian’ny zandary tamin’ny fotoana nihaonana sasantsasany dia natao ho antoka ho an’ny fiarovana ny rehetra.
Mahakasika ny tetikasa fambolen-kazo, zava-dehibe ny manamarika fa tao anatin’ny taona vitsivitsy lasa, ny vokatra ara-pambolena dia voasembana noho ny fitotongan’ny rotsakorana izay mbola misy fiantraikany amin’ny faritra atsimon’i Madagasikara manontolo. Ny tetikasa hafa nataon’ny Tozzi Green dia natao indrindra mba hiarovana ny fitokisan’ireo antoko rehetra voakasika. Ny hetsika fambolen-kazo dia tsy isalasalana fa afaka mandray anjara lehibe amin’ny famahana ny olana goavana ateraky ny fiovan’ny toetr’andro, amin’ny fanatsarana ny toe-tany sy ny toetr’andro ao amin’ny faritra amin’ny alalan’ny fambolena karazan-kazo voafantina tsara sy tsy mampidi-doza. Ankoatra izany, zava-dehibe ny manamarika fa ny mekanisma crédit carbone dia ekena maneran-tany ho iray amin’ireo rafitra mahomby indrindra amin’ny fampiroboroboana ny ady amin’ny fiovan’ny toetr’andro. Io rafitra io dia voafehin’ny fitsipika hentitra, ary mitaky antontan-taratasy feno, fitsirihana eny ifotony, ary fanaraha-maso tsy tapaka amin’ny famoronana sy fitantanana ireo tetikasa.
Farany, mba hanazavana ireo lafiny rehetra mifandraika amin’ny Fitarainana napetraka tao amin’ny PCN, dia azafady mba tsidiho ny pejy manokana mitondra ny lohateny hoe “Focus Madagascar” izay hita ao amin’ny tranonkalan’ny Tozzi Green amin’ity rohy manaraka ity : https://www.tozzigreen.com/fr/focus-madagascar/.
French