Nisy ny fitsidihana tampoka nataon’ny minisitry ny Fitsarana, Rakotomandimby Alexis Bejamin Alexis, teny amin’ny fonjan’Antanimora, omaly maraina. Fepetra maromaro no noraisina tamin’izao fidinana ifotony izao.
Anton’ny fitsidihana tampoka ny fijerena ny fomba fiasa sy ny lesoka amin’ny fitantanana ity fonja ity. Hijerena koa ny ahafahana manampy ireo mpandraharahan’ny fonja amin’ny fanatsarana ny tontolo iasan’izy ireo. Eo koa ny fanatsarana ny toe-piainan’ireo voafonja. Anisan’ny fepetra efa noraisina ary nojerena ny fampiharana azy ny fanakatonana ny “Maputo” eny Antanimora nefa tsy mbola notanterahina izany. Notsiahivin’ny minisitra fa nosokafana io toerana io mba hamonjana ireo noheverina fa gadra politika. “Tsy misy intsony izany gadra politika izany izao. Ao anaty code pénal tsy misy soratra hoe rehefa nanompa olona, na nanao délit hafa dia hoe gadra politika, fa gadra noho tsy fanarahan-dalàna no ao”, hoy izy. Fanatsaharana ny tombo sy hala eo amin’ny samy voafonja no anton’izao fanampahan-kevitra izao, ary hiarovana ireo mpandraharahan’ny fonja amin’ny mety ho fanendrikendrehana kolikoly, araka ny nambarany. “Mandoa volabe ireo voafonja ao Maputo raha ny resaka. Koa ho fiarovana anareo mpandraharahan’ny fonja ihany koa no anton’ny fanampahan-kevitra hanakatonana izany”, hoy ny minisitra. Nanome baiko ny minisitra hanapahana ny jiro sy ny rano, ary hanakatonana avy hatrany an’i Maputo. Nambarany fa ho dinihina ny hampiasana izany toerana izany, sy ireo toerana hafa mety ahazoan’ny voafonja hafa tombodahiny manokana.
Nanazava ny fepetra hampiharin’ny fitsarana manoloana ireo karazana heloka bevava koa ny minisitra. Eo ny fanondranana olona, ny fakana an-keriny, ny fanolanana zaza tsy ampy taona, ny herisetra mifototra amin’ny maha lahy, na ny maha olona, ny vono olona, ny fidorohana sy famarotana zava-mahadomelina, ny fanondranana antsokosoko ny harem-pirenena, ny halatra zaza varira, ny fandorona ala sy doro tanety. “Hampidirina am-ponja vonjimaika ireo raha vao tonga ao amin’ny fampanoavana”, hoy ny tonia mpampanoa lalàna eo anivon’ny fitsarana. Mitaky sazy hentitra sy sazy mihatra na “peine ferme” ny fampanoavana mandritra ny raharaham-pitsarana, araka ny voalaza.
Synèse R.
French