Nambaran’ny talen’ny fampandrosoana maharitra ny tanàna, eo anivon’ny minisiteran’ny Fitsinjaram-pahefana sy ny fanajariana ny tany (MFFT), Ramaroson Miary, fa mitohy ny fifampizarana traikefa. Efa nisy ny fiofanana teo aloha momba ny fiatrehan’ny tanàna sy ny kaominina ary ireo minisitera samihafa ny fiovaovan’ny toetr’andro, araka ny nambarany. “Miditra amin’ny fampiofanana sy ny ho fanapariahana izany kosa izao ho amin’ireo hampihatra ireo fepetra hiatrehana izany fiovan’ny toetr’andro izany”, hoy izy, tetsy Antaninarenina, omaly. Anisan’ny mpiofana ny eny anivon’ny kaominina, ny sampandraharaha teknika, ireo mpisehatra amin’ny fanorenana sy mpahay taotrano, ny Oniversite. Nanteriny fa anisan’ny tanjona ny hampiharana ny fiofanana sy ny traikefa azo amin’ny alalan’ny tondrozotra. Eo koa ny fametrahana drafitra fohy sy lavitra ezaka. Anton’ny nanaovana izao ny fahitana ny voka-dratsin’ny fiovaovan’ny toetr’andro, ka mampikorontana ny fiarahamonina amin’ny ankapobeny. Noraisiny ho ohatra ireny ora-mikija ireny. “Mba efa mahalala ny tokony hatao isika rehefa miseho ny voina”, hoy izy.
Synèse R.
French