Nidiran’ny jiolahy antsokosoko tao amin’ny efitrano natoriany, teratany vahiny voaroba vola, niampy fitaovam-piadiana tao Mahambo, Fenoarivo Atsinanana, ny faran’ny herinandro teo.
Teratany vahiny sy ny vady aman-janany niara-lasibatry ny asan-jiolahy tao amin’ny trano fandraisam-bahiny iray ao Doany, kaominina Mahambo, distrika Fenoarivo Atsinanana, ny alin’ny sabotsy 1 marsa teo. Nivahiny tao an-toerana, navelan’io raim-pianakaviana io nisokatra ny varavarankelin’ny efitrano nisy azy ireo nandritra ny alina. Niditra an-keriny tao amin’ilay efitra anefa ny lehilahy iray izay nitsofoka teo amin’ny varavarankely. Resin-tory ilay mpivady sy ny zanany roa vavy. Nangonin’io mpandroba io avokoa ny entana sarobidy rehetra tao anatin’ilay trano. Lasany tamin’izany ny fitaovam-piadiana “Pistolet” marika Taurus, calibre 7,65 mm. Norobainy koa ny finday raitra roa marika ASS Galaxy sy Redmi Note 10. Tsy vitan’io, nentin’ilay tsy valahara nanaraka azy ny ordinatera. Tsy nisy nahare ny nidiran’ilay jiolahy tao amin’ny trano ireo efa-mianaka, araka ny fanazavana.
Hitan’ny mpiambina
Araka ny fanadihadiana nataon’ny tomponandraikitra, nanatri-maso ny fandalovan’ilay mpandroba ny mpiambina tao anatin’ilay tanàna nisy ny trano fandraisam-bahiny. Nilaza ho tsy afaka nanao na inona na inona anefa ity farany. Nahare ny zava-misy, nampandre ny mpitandro filaminana ao Mahambo ny tomponandraikitry ny hotely. Nanao ny famotorana ny zandary ka niroso amin’ny fikarohana ny tompon’antoka tamin’io fandrobana io. Nohazonina hatao fanadihadiana koa ilay mpiambina.
Tsiferana R.
French