Vaky loha niharan’ny daroka sy vono nataon’ny fokonolona ny jiolahy iray voasambotra tao amin’ny fokontany Anamakia, kaominina Antsiranana, ny talata 4 marsa teo, tamin’ny 8 ora sasany alina. Voasambotra teo am-pikasana hanao ny asa ratsiny io lehilahy io. Malaza ratsy amin’ny vaky trano sy fandrobana miharo vono izy. Tsy nanaiky ny fokonolona ao an-toerana ka nivondrona nanoloana ny biraom-pokontany. Nitora-bato ny ankamaroan’izy ireo ary nisy mihitsy aza ireo nidaroka. “Maherin’ny 300 ireo olona nikasa hanampitra ny ain’io olon-dratsy io”, araka ny fanazavan’ny zandarimaria miasa ao an-toerana. Nigadona teny an-toerana nandamina ny raharaha sy naka ilay mpandroba ireto farany. Notsaboina teny anivon’ny mpitsabo noho ny ratra nahazo azy io jiolahy io. Nentina natao famotorana ary atolotra ny fitsarana hizaka ny sazy sahaza azy izy. Niverina amin’ny laoniny ny fandriampahalemana ao an-toerana.
Tsiferana R.
French