Namoy ny ainy ny mpamily mpanampy tao anatin’ny taksiborosy tra-doza tao Soanahory, kaominina ambanivohitra Akotrofotsy, distrikan’i Miandrivazo, omaly vao maraina. Nikasa hihazo an’i Morondava, nitondra mpandeha io taksibrosy io. Vaky tampoka ny kodiarana. Nivadibadika ny fiara izay nandeha mafy. Tafavoaka ivelan’ny fiara ny mpamily mpanampy. Namoy ny ainy vokatry ny ratra nahazo azy io lehilahy io. Mpandeha miisa fito naratra nandritra ity voina ity. Nidina ifotony nijery ny zava-nisy ny zandarimaria miasa ao an-toerana. Natao ny famotorana ka voamarina fa nitarika ny loza ny fahavakisan’ny kodiarana. Nentina namonjy toeram-pitsaboana ireo naratra mafy. Zandary iray koa, maty voatsindrin’ny “tracteur” nitondra azy ireo tao Besely Tsinjorano, kaominina Belo/Tsiribihina, ny talata 4 marsa teo. Niaka-piakarana, nihemotra tampoka io fiara io ka niteraka ny loza, tamin’ny 5 ora sy 20mn tolakandro. Avy namita iraka ity zandary ity izao maty niharan-doza izao.
Tsiferana R.
French