Niverina nihenjan-droa ny tady eo amin’ireo mpino katolika etsy amin’ny fiangonana Md Jérôme Anosibe sy ny olon-tsotra mibodo ny tany. Niverina niakatra fitsarana afakomaly indray ny raharaha, telo taona taorian’ny nivoahan’ny didim-pitsarana, ny taona 2021. Resy ilay olon-tsotra. Nigadona teny an-toerana nanatanteraka ny didy navoakan’ny fitsarana ny vadintany sy ny mpitandro filaminana, ny volana desambra. «Niverina napetrak’ilay olon-tsotra tamin’ny toerana ireo zavatra nesorina», hoy ny fanazavan’ny solontenan’ny mpino eo anivon’ny fiangonana. Niverina ny fifampitoriana momba io raharaha io. Ananan’ny fiangonana taratasy ara-dalàna io tany hiadivan’izy ireo amin’ny olon-tsotra io, araka ny fanazavan’ny Pretra miasa eo an-toerana, mompera Ratsimiato Hyacinthe. Etsy ankilany, voatazona vonjimaika any am-ponja ilay voalaza ho tompon’atoka tamin’ity fanodinkodinana ny tanim-piangonana ity, araka ny loharanom-baovao. Marihina, niakatra fitsarana teny Anosy, afakomaly, ny raharaha. Nanamafy ny solonten’ny mpino fa toherin’izy ireo hatramin’ny farany ny fibodoana io ampahan-tany an’ny fiangonana io. “Hiverina hiakatra fitsarana indray io raharaha io amin’ny 20 marsa ho avy izao”, hoy ny solontenan’ny mpino eo anivon’ny fiangonana voakasika. Andrasana ny tohin’ny raharaha.
Tsiferana R.
French