Homarihina ny 29 marsa izao ny faha-78 taon’ny tolom-panafahana 1947. Nambaran’ireo komity mpikarakara fa natao hetsika nasionaly ho fahatsiarovana sy fanamafisana ny soatoavina izany ka hotsarovana amin’ny toerana telo samihafa.
Hanamarika ny fandaharam-potoana ho an’ny eto Antananarivo ny fanokafana amin’ny fomba ofisialy izany, ny 21 marsa, etsy amin’ny Kianja Barea Mahamasina. Hiaraka amin’izany koa ny any Moramanga. Hitohy amin’ny fizaham-pahasalamana maimaimpoana ho an’ ny mpiady tia tanindrazana mbola velona sy ny zokiolona mihoatra ny 50 taona izany. Hatramin’ny 27 marsa kosa ny fampirantiana momba ny tolom-panafahana. “Natao hisarihana ny sain’ny olom-pirenena, indrindra ny tanora, mba hahafantaran’izy ireo sy handovany ny tantara izany. Eo koa ny fampirantiana mitety sekoly”, hoy ny mpikarakara.
Hotanterahina ny 22 marsa, eny amin’ny fiangonana Advantista Soamanandrariny, ny fotoam-pivavahana ary mbola hitohy ny 23 marsa etsy amin’ny Katedraly Andohalo izany hotarihin’ny avy amin’ny FFKM. Tahaka izany koa ny any Moramanga, ao amin’ny FJKM Fitiavana.
Horonantsary manasongadina ny tolona 1947
Hatao ny 29 marsa ny fametrahana fehezam-boninkazo amin’ny toerana manan-tantara, ho fanomezam-boninahitra ireo mahery fo eny amin’ny fasan’ny mahery fo, eny Mausolée, ialohavan’ny etsy amin’ny tsangambaton’ny MDRM, Ambohijatovo. Hizarana solombodiakoho sy fanomezana ireo bekotromaroholatra mandritra ny hetsika.
Hatao ny 25 hatramin’ny 27 marsa ny fampirantiana ny tolom-panafahana ao amin’ny akany Fiadanantsoa, Moramanga. Arahan’ny fizaham-pahasalamana maimaimpoana ho an’ireo tia tanindrazana sy zokiolona mihoatra ny 50 taona koa. Ny 29 marsa ny fametrahana fehezam-boninkazo eny fasan’ny maherifo Ampanihifana sy ny eo amin’ny tsangambato 1947. Fandefasana horonantsary manasongadina ny tolom-panafahana tamin’ny 29 marsa kosa ny hariva. Mitovy amin’izany koa ny hetsi-pahatsiarovana hatao any Manakara.
Synèse R.
French