Nanakoako nanerana an’i Afrika alina, ny lazan’i Madagasikara. Nomontsanin’ny Barea de Madagascar, tamin’ny isa mazava 4 no ho 1 ny Les Fauves-n’i Centrafrique. Fihaonana hiadian-toerana ho an’ny «Mondial 2026», taranja baolina kitra. Niverina indray ny lazan’i Madagasikara.
Afaka ny andro ratsy ho an’ny Barea de Madagascar. Taorian’ny faharesena misesisesy nahazo ny ekipam-pirenena malagasy, niverina niarin-doha indray izy ireo ka nibata fandresena omaly. Lavon’ny Barea, tamin’ny isa mazava 4 no ho 1 ny Les Fauves-n’ny Centrafrique. Fihaonana, tafiditra amin’ny andro fahadimy hiadian-toerana ho an’ny «Mondial 2026», notanterahina omaly alina tao amin’ny kianja Larbi Zaouli, Maroc.
Baolina roa tafiditr’i Rayan, kapitenin’ny ekipa malagasy teo amin’ny minitra faha-17 sy ny faha-20 ny fidirana voalohany. Nampian’i Arnaud Ya Ya, minitra faha-48 sy ny an’i Lalaina, teo amin’ny faha-88 minitra.
Ry zareo Centrafrique anefa no nanokatra ny isa, tamin’ny alalan’ny « coup franc » teo amin’ny minitra faha-9, ka tafiditr’i Gamboro.
Tamin’ny ankapobeny, nanjakan’ny Barea de Madagascar ny fihaonana. Tsy nahavita mihitsy ny Les Fauves. Tsara rafitra ny fiarovantena malagasy nahitana an’i Marcelin sy i Fontaine ary i Rado niampy an’i Morgan. Nandrindra ny fanafihana teo afovoan’ny kianja kosa i Rayan sy i Marco ary i Couturier. Tany aloha nahitana an’i Lapoussin sy i Arnaud (Ya Ya).
Hain’ny Malagasy ny namezivezy ny baolina niainga any aoriana mandalo ny afovoan’ny kianja ary mitady ireo lohalaharana. Sahirana ry Cedric sy ry Axel nanakana ireo lohalaharana malagasy, tamin’ny tolotra haingam-pandeha. Nitsitapitapy ny fanafihan’ny Les Fauves, notarihin’i Geoffrey, mpilalaon’ny Olympique de Marseille saingy tsy nandingana teo anatrehan’i Marcellin, anisan’ny mpilalao nisongadina ho an’ny Barea. Nanolo mpilalao i Corentin Martins, teo amin’ny fidirana faharoa, ka nampiditra an’i Lalaina sy i Njiva ary i Baggio, teo amin’ny fidirana voalohany. Nahazo isa 3 ny Barea taorian’ity fandresena ity ka lasa manana isa 10. Amin’ny alatsinainy ho avy izao, hifandona amin’i Ghana ny Barea. Lalao atao any Maroc hatrany.
Tompondaka
French