Anisan’ireo naneho ny heviny sady nitondra fanazavana ny minisitra, Volamiranty Mara Donna, momba ny tetikasa Base Toliary.
“Ho an’i Madagasikara iray manontolo ny fampandrosoana sy ny tombontsoa ho azo amin’ny tetikasa Base Toliara”, hoy ny minisitry ny Serasera sy ny kolontsaina sady mpitondra tenin’ny governemanta, i Mara Volamiranty Donna, manoloana ny fanoherana sy fambolena korontana momba ny Base Toliara. Tombontsoa maro no ho azo amin’ny fanatanterahana azy ity. Seha-pihariana maro no hisitraka tombontsoa, indrindra ny any an-toerana. Marina tokoa fa misy karazana olona manohitra an’izay tetikasa izay. Ny azo lazaina voalohany aloha, tetikasa goavana io ho amin’ny fampandrosoana an’i Madagasikara. 5 miliara dolara no tombontsoa ho azon’ny Malagasy amin’io tetikasa io. Raha izany vola izany no tonga eto, mazava ho azy fa hisy ny fotodrafitrasa sy ny fanatsarana ny fiaimpiainan’ny Malagasy manomboka any amin’ny toerana isian’ny tetikasa izay hiantombohan’ny hisitraka an’izany.
Fanadihadiana ny lafiny fahasalamana
Misy ny dingana efa natao ny amin’io tetikasa io. Anisan’ izany ny fanadihadiana ny lafiny fahasalamana ho an’ny rehetra voakasika mivantana na ankolaka. Eo koa ny fanadihadiana ny sehatry ny tontolo iainana. Misy milaza hoe ho potika ny tontolo iainana, hisy lavaka be eo amoron’ny ranomasina… Nefa an-kilometatra maro lavitry ny morontsiraka io tetikasa io. 46 Km miala an’i Toliara ny toeram-pitrandrahana. Efa nisy fampitam-baovao natao momba an’izay. “Aoka ny vaovao marina no hampitaina ho fantatry ny olona rehetra momba an’io tetikasa io”, hoy izy.
R. Nd.
French