Olona enina naratra mafy vokatry ny lozam-pifamoivoizana niseho tetsy Mandroseza, omaly. Kamiao tapaka hisatra nizotra tamin’ny lalana midina no antony nahatonga ny loza. Nifatratra tamin’ny fiara teo alohany sy nandona mpandeha an-tongotra maro izy io.
Nitrangana lozam-pifamoivoizana indray tetsy Mandroseza, teny amin’ ny lalana Andriamanelo, omaly tamin’ny 4 ora folakandro. Naratra mafy, vokatr’izany, ny olona miisa enina, lasibatry ny fifandonana. Tapaka hisatra ny fiara lehibe iray rehefa nandalo teo amin’ny lalana midina ho any Mandroseza, antony nahatonga ny loza, raha ny fanazavana voaray. Avy any Ambohimiandra hihazo an’ Ankadindratombo io fiara camionnette io no nitranga ny loza. Nifatratra tany amin’ny fiara Toyota Land Cruiser iray teo alohany izy tamin’izany. Naratra mafy nandritra izany ny mpamily sy ny raim-pianakaviana iray 72 taona tao anatiny. Voa mafy teo amin’ny ilany havia moa io raim-pianakaviana iray io. Voadona ihany koa ny moto routière iray marika Honda handeha hiakatra nifanohi-dalana tamin’izy ireo ka naratra mafy ilay mpitondra moto.
Tsy tafajanona fa nandona mpandeha an-tongotra
Tsy mbola tafajanona anefa ilay fiara nitera-doza fa nahadona mpandeha an-tongotra tamin’ny sisin-dalana hafa indray. Voadona nandritra izany ireo olona telo: lehilahy 21 taona mpaka sary izay monina eny Ampasanimalo. Vehivavy 17 taona, mpianatra monina ao Mahatsinjo Alasora, ary lehilahy 36 taona mpanao soudure monina eny Ambohimanambola.
Nalefa notsaboina eny anivon’ny hopitaly HJRA avokoa ireo lasibatra rehetra ireo taorian’ny tranga. Eo ambany fanaraha-mason’ny mpitandro filaminana sy hanaovana fanadihadiana kosa ilay mpamilin’ilay fiara nandona amin’ izao fotoana izao.
Tsiahivina fa nisesisesy ny lozam-pifamoivoizana tato ho ato. Anisan’ny antony voalohany ny fandraisan’ny mpamily zava-pisotro misy alikaola ka tsy mahafehy ny familiana intsony. Nahafaty olon-tsotra sy mpamily mihitsy izany tamin’ ity herinandro ity.
Mino
French