Anisan’ireo fitaovana miavaka kely, nandritra ny fankalazana ny Andro iraisam-pirenen’ny tany miteny frantsay, « Frankofonia », izay natao teny Ankorondrano, ny volana marsa teo, ny lafaoro mandeha amin’ny herin’ny masoandro. Fikarohana izay nataon’Andriandraina Jean Pierrot, sy ireo namany mirahalahy efa hatry ny ela.
«Ny fitiavana fikarohana sy fitrandrahana zava-baovao no nitsirian’ity hevitra iray hanamboatra lafaoro mandeha amin’ny herin’ny masoandro ity ary izao tanteraka izao, ka haranty amin’ity hetsika ity”, hoy Andriandraina Jean Pierrot.
Nilaza ny tenany fa tsy sarotra velively ny manatanteraka ny sanganasa toy izao, ireo zavatra iainana andavanandro ihany no hampiasaina dia vita izany. Tanjona iray lehibe nanaovana ity fitaovana fandrahoana sakafo ity ny hampafantarana ny tanora fa azo ampiasaina tsara ny zavatra iainantsika isan’andro ary azo atao ihany koa ny miaro ny tontolo iainana mba hitsinjovana ny hoavy.
Tsara ny mampahafantatra fa mpianatra iray, nivoaka tamin’ny Oniversite ASJA tao Antsirabe, Andriandraina Jean Pierrot, ary ny taranja informarika no tena nianarany. Nametraka hafatra ho an’ireo tanora malagasy maro ny tenany. Tokony hiezaka ny hikaroka sy hitady fitaovana na zavatra vaovao ny tanora, hahafahana mivelatra sy mampandroso ny firenena ary indrindra ho fiarovana ny tontolo maitso sy ny zavaboary eto Madagasikara.
Fitaovana nanamboarana azy
Maro tokoa ny fitaovana nampiasaina hoy i Jean Pierrot, saingy tsy dia sarotra ny manao azy. Eo ny fitaratra vita amin’ny taratasy sy ny fitaratra tsotra ary ny taolana sy hazo. “Hatao fotsiny izay hisian’ilay toerana mihiboka hahamasaka tsara ireo sakafo hatao ao aminy”, raha ny fanazavana nataon’ity tovolahy iray ity. Nomarihiny fa tsy mandany vola be ny fanaovana asa tanana toy izao, fa ireo fitaovana tsotsotra dia efa mety ahafahana manao izany.
Tsy mifidy sakafo
Araka ny nambaran’i Jean Pierrot, azo atao ao avokoa ireo sakafo rehetra tiana handrahoana, saingy miankina amin’ny fitaovana ampisaina sy ny toetr’andro izany. “Rehefa tratry ny taratra hazavan’ny masoandro tsara ilay lafaoro, vetivety ihany ireo sakafo dia masaka. Maharitra eo amin’ny 30 minitra hatramin’ny 1 ora eo izany, dia vita izay tiana hatao”, araka ny nolazain’ity tanora ity. Rehefa andro ratsy kosa, somary mandany fotoana ny fampiasana azy.
Nanome ohatra ny tenany fa rehefa tsara ny toetr’andro, eo amin’ny 15 minitra eo dia efa masaka ny atody, raha toa ka izany no apetraka ao amin’ity lafaoro mandeha amin’ny herin’ny masoandro ity.
Nanatontosa : Fitia Randria
French