Nigadona teny Ivato, afakomaly alina, ny manampahaizana amin’ny resaka bozaka, avy amin’ny Caf. Nafaran’ny filohan’ny Federasionina malagasin’ny baolina kitra (FMF), Randriamanampisoa Alfred, manokana.
Hiala nenina! Tsy kivy mitady vahaolana ho an’ ny fanamboarana ny Kianja Barea Mahamasina ny Federasionina malagasin’ny baolina kitra (FMF). Araka ny loharanom-baovao iray eo anivon’ny FMF, omaly, efa tonga eto an-toerana ny manampahaizana momba ny bozaka avy amin’ny Caf, izay nafaran’ ny filohan’ny FMF, Randriamanampisoa Alfred.
Raha ny fantatra, dia haharitra telo andro eo ny fandalovan’ity manampahaizana ity eto an-toerana.
Nilaza ny lehiben’ny baolina kitra malagasy eto an-toerana, fa rehefa vita tanteraka ny fiofanana sy ny fitsirihana hataony eto, hiala eto Madagasikara indray izy, ary hiverina eto an-tandrizana ny volana mey ho avy io. Natao izao hetsika izao hahafahan’ny Kianja Barea Mahamasina handray lalao iraisam-pirenena.
Ankoatra izay, mbola miandry ilay fampanantenana nataon’ny Fifa sy ny Caf ny Malagasy mpankafy baolina kitra maro, mahakasika ilay resaka fanamboarana fotodrafitrasa eto an-toerana. Anisan’ izany ny fanavaozana ny Kianja Rabemananjara sy ny fananganana ivontoeram-piofanana any Mahajanga.
Toeran’ny mpanao gazety
Ny bozaka ihany no lasa laharam-pahamehana ho an’ny tomponandraikitry ny Kianja eto Madagasikara. Tsy mbola nasiana resaka kosa ny fanatsarana ny toeran’ny mpanao gazety izay tsiahivina ihany fa ao anatin’ilay takin’
ny Caf. Raha ny tazana teny amin’ny Kianja Barea nandritra ny lalao “Match de Gala”, ny 26 marsa lasa teo, toa labasy moderina natao hialokalofana no nataon’izy ireo teny an-toerana, fa tsy misy ny fanavahana araka ny fepetra napetraky ny Caf.
F. R
French