Nanambara i Hervé Arsène Malabary, ilay Malagasy mpilalao baolina kitra monina any Frantsa, ny alarobia 26 marsa lasa teo, nandritra ilay “Match de gala” natao tetsy Maha-masina, fa vonona ny tenany hizara ny traikefany hampandrosoana ny baolina kitra eto Madagasikara. Raha tsiahivina, mpilalao novolavolaina tao amin’ny AC Sotena Mahajanga i Malabary, araka ny anarana nahalalan’ny mpankafy baolina kitra azy. Avy eo niondrana tany Frantsa ka nilalao tao amin’ny RC Lens, izay tena nampisongadina azy ka nahazoany ny tompondakan’i Frantsa, ny taona 1998. Taorian’izay, niofana ho mpanazatra ny tenany ka namolavola mpilalao maro. Anisan’ ireny, ilay frantsay, i Raphael Varane, nandrombaka ny ho tompondaka maneran-tany 2018 ary nahazo ny “Champions league” inefatra sy ny amboaran’i Espagne, tao amin’ny Real de Madrid.
Teo koa ilay ivoarianina, i Serge Aurier, nahazo ny tompondakan’i France 2015 sy 2016 tao amin’ny PSG ary ny “Can 2015” sy “2023” raha tsy hitanisa afa-tsy ireo. Nisy koa ireo Malagasy mpilalao nomeny izay fahaizany izay sy nampiany ho lasa matihanina, toa
an’i Bôlida izay efa nilalao tao amin’ny RC Lens, i Dafé sy i Gladyson. Mitodika any amin’ ny federasionina, araka izany, ny mason’ny maro ny amin’ny mety ho fiaraha-miasan’ny roa tonta.
Tompondaka
French