Dahalo mpangalatra omby lavon’ny mpitandro filaminana nandritra ny fifanjevoana tao amin’ny fokontany Ambahary, kaominina Manerinerina, distrikan’Ambatoboeny, omaly maraina. Tratra teo am-pangalarana omby io dahalo fanta-daza amin’ny solon’anarana hoe Dauphin io. Nentina hamonjy ny biraon’ny zandary izy. Notolominy io mpitandro filaminana nitondra azy io ary nokasainy alaina ny fitaovam-piadiana. Niaro-tena ny zandary ary nampiasa ny basy teny aminy. Voan’ny bala i Dauphin ka antony nitarika ny famoizan’aina. Efa matetika mpanao halatra omby ao amin’ny distrikan’Ambatoboeny io lehilahy io saingy izao vao tratra. Natolotra ny fokonolona ny vatana mangatsikany. Mitohy ny hazalambo ataon’ny zandarimaria manoloana ny fisian’ny dahalo sy ny fakana an-keriny ao amin’io distrika io.
Tsiferana R.
French