Namoy ny ainy tampoka ny alatsinainy hariva teo, etsy amin’ny kianja fanaovam-baolina Analankinina Hopitalibe i Rado, raim-pianakaviana 43 taona. Manambady ary namela kamboty roa mianadahy izy. Raha ny angom-baovao, mpiasa teo anivona orinasa tsy miankina iray eto an-drenivohitr’ i Toamasina izy teo aloha, saingy efa ho dimy taona izay naaton’ ity orinasa tsy miankina ity tamin’ny asany izy. Niezaka nitady vola ihany tamin’ny alalan’ny fanjairana kiraro anefa izy, raha ny angom-baovao hatrany. Manofa trano izy efatra mianaka. Tsy takatry ny fidiram-bola anefa ny fitambaran’ny hofan-trano sy sakafo hohanina isan’ andro. Voatery nalana tany an-tsekoly ireo zanany. Tsy vitan’izay fa matetika roahin’ny tompon-trano amin’ny trano izy ireo noho ny fahataran’ny hofan-trano. Raha ny marina, efa tsy mahaloa intsony ny hofan-trano ka lasa tokantrano tsy manana fialofana. Vokany tsy nahazaka ny onjam-pianana intsony izy mivady, ka lasa nivarilavo tamin’ny fisotroana, mitety trano fivarotana zava-pisotro mahamamo, mahita namana dia raikitra. Raha hisotro tokoa dia manome ny namana fa raha vola hividianana sakafo dia tsy manome mihitsy izy ireo.
Hitan’ny fokonolona fa somary nalemilemy izy ny atoandron’ny alatsinainy sady mamo, tsy nisy sakafo ihany koa. Ny takarivan’ izay ihany izy efa mitsirara teo ambony ahi-maitso izy ka ireo olona nandalo no nampisotro rano azy, kinanjo tsy nahasakana ny ainy izany. Noraisin’ny rehetra ho an-tsirabina nataon’ny fianakaviany ihany izao rehetra izao, izay tsy nisy fitsimbinana azy efatra mianaka. Nohamafisin’ny mpitsabo misahana ny BMH eo anivon’ny kaominina ambonivohitr’
i Toamasina fa maty vokatry zava-pisotro misy alikaola, tsy nisakafo i Rado.
Sajo
French