Ain’olona miisa roa indray nafoy nandritra ny lozam-pifamoivoizana niafara tamin’ny fitsaram-bahoaka tao Ambodivoanjo, kaominina ambanivohitra Tsarajomoka, distrikan’ i Mandritsara, afakomaly. Nitatitra vokatra avy any ambanivohitra ny traktera iray. Nifanena tamin’ny mpanadalo. Voafaokan’ilay traktera tampoka ity farany. Notetezin’ny kodiarana aoriana ka namoy ny ainy. Tsy nijanona anefa ny mpamily io fitaovam-pitaterana io fa nanohy ny diany. Nifanenjehan’ny fokonolona izy sy ny mpamily mpanampy ary ny mpibata entana nitaingina ny fiara. Naratra mafy vokatry ny daroka sy vono nahazo azy ny mpamily mpanampy. Tsy tana ny ainy noho ny fahaverezan-dra be loatra. Niezaka niaro tena saingy tratra ny be no ho vitsy izy telo lahy. Vokany, naratra ihany koa ny mpamily ilay traktera sy ny mpibata entana. Nidina ifotony nijery ny zava-nisy ny tomponandraikitry ny filaminana ao amin’ny distrikan’i Mandritsara. Niverina amin’ny laonina ny fandriampahalemana. Manaraka fitsaboana ireo naratra niharan’ny fitsaram-bahoaka. Natolotra ny fianakaviany ny vatana mangatsiakan’ireo roa namoy ny ainy.
Manjaka ny fitsaram-bahoaka
Mampihatra ny fitsaram-bahoaka avy hatrany ireo fokonolona ao amin’ny distrikan’i Mandritsara rehefa misy tranga tsy eken’ny sain’izy ireo, tato ho ato. Olona roa tao anatin’ny tapa-bolana namoy ny ainy. Ankoatra io mpamily mpanampy tratran’izy ireo tao Ambodivoanio io, maty nodarohana sy nodorana koa ilay lehilahy namono ny rahalahiny tao Mahambolona, ny 3 jona lasa teo. Mampahatsiahy ny fokonolona eny ifotony ny mpitandro filaminana fa voararan’ny lalàna ny fampiharana ny fitsaram-bahoaka ary mahavoasazy.
Tsiferana R.
French