Nentina eny anivon’ny kaomisaria Central Tsaralalàna ny lehilahy mpanimba fananana iombonana tratra tetsy Anosy, omaly maraina tamin’ny 3 ora sy 45 minitra. Miandry maizimaizina sy tsy misy mpandalo, nasesin’io tsy valahara io nalaina ny jiro mandeha amin’ny herin’ny masoandro manazava ny lalana manodidina ny farihin’Anosy. Mihanika ny andrin-jiro izy ary alainy eny ambony eny io fitaovana anisan’ny manome endrika sady mariky ny fandrosoan’ny tanàna io. Nandalo tampoka ny polisy monisipaly mpanao fisafoana alina. Tratra teo am-pitaterana ireo jiro efa nalainy io lehilahy io. Nokasainy hamidy ireo jiro avy nangalariny ireo. Nentina avy hatrany eny amin’ny biraon’ny polisy natao famotorana io lehilahy io ary hatolotra ny fampanaovana aorian’izay. Naverina amin’ny tomponandraikitra ireo jiro miisa dimy nangalariny. Marihina, misy hatrany ny ezaka ataon’ny tomponandraikitry ny Kaominina Antananarivo Renivohitra amin’ny fanatsarana ny endriky ny tanàna sy ho fampandrosoana, saingy simbain’ireo karazan’olona tahak’ity tratra nangalatra ity.
Tsiferana R.
French