Niakatra fampanoavana omaly ireo olona dimy voasambotra, voarohirohy tamin’ny famonoana karana, 67 taona, sy fandrobana tranombarotra tany amin’ny fokontany Manga – Mahajanga, ny 22 aogositra atoandro. Anisan’ny nahavanon-doza, namono nahafaty io karana tompon’ny tranom-barotra io, ny lehilahy mpitarika posy sady mpitatitra entam-barotra mivezivezy isan’andro eny an-toerana. Mpiasa ao amin’ilay karana ny iray hafa, mpivarotra ivelan’ny tranombarotra ny iray, ary olona nosokajian’ilay raim-pianakaviana namoy ny ainy, ho zanaka an-trano efa mpivezivezy ao ny iray.
Raha tsiahivina, notafihin’ny jiolahy tsy misaron-tava tao amin’ny toeram-pivarotany ny karana mpandraharaha ara-barotra iray, ny zoma 22 aogositra teo. Maty notsindromina sy nofiraina tamin’ny zava-maranitra ny tendan’io karana io. Lasan’ireo jiolahy ihany koa ny vola mitentina 2 400 000 Ariary niaraka tamin’ ny entam-barotra vitsivitsy. Voarakitra tao anaty ” Caméra de surveillance” ny fihetsika sy ny endrik’ireo roa lahy nanafika. Nanomboka teo ny fikarohana sy nahatrarana ireo jiolahy miisa dimy ireo. Voasambotry ny polisy tamin’ ny 25 aogositra teo ny roa tamin’ireo olon-dratsy. Voasambotry ny zandary kosa ny telo hafa. Mbola mitohy ny fikarohana ireo naman’ireo olon-dratsy hafa.
Mino
French