Natolotry ny minisiteran’ny Tontolo iainana sy ny fampandrosoana maharitra (Medd), omaly, ny fitaovana sy kojakoja manokana ho ampiasain’ireo manamboninahitra polisin’ny tontolo iainana, Officier de police judiciaire de l’environnement (OPJE) miisa 60. Miisa 23 ireo fitaovana, ahitana fitiliana entona, fandrefesana ny tahan’ny setroka avoakan’ny fiarakodia, ny tahan’ny merkiora amin’ny rivotra, ny rano ary ny tany. Ny Fitantanana foibe ny aro loza amin’ny fifamoivoizana (DGSR) no hisitraka ireo fitaovana ireo, hanamafisana ny fisorohana sy ny fampanarahan-dalana iadiana amin’ny fandotoana.
Tanteraka ity fiaraha-miasa ity noho ny tetikasa Planet Gold Madagasikara, famatsiam-bola avy amin’ny Tahirimbola ho an’ny tontolo iainana maneran-tany (FEM) ary tantanin’ny Onudi. Tafiditra ao anatin’ny fanatanterahana ny fifanarahana Minamata momba ny merkiora. Nilaza ny minisitry ny Tontolo iainana sy ny fampandrosoana maharitra (Medd), Andonirina Max Fontaine, fa hanamafisana ny fitaovana hoenti-miasan’ireo OPJE ity hetsika ity. Ilaina tokoa izany, satria miantraika amin’ny fahasalaman’ny olombelona ny fahalotoan’ny rivotra.
Miara-miasa amin’ny tetikasa Planet Gold Madagasikara ny minisiteran’ny Tontolo iainana (Medd), ny Fitaterana sy ny famantarana ny toetr’andro, amin’ny alalan’ny ATT, ny Zandarimaria ary ny Fahasalamana.
Njaka A.
French