Fihaonana iraisam-pirenena karakarain’ny FMI ny New Economy Forum. Lohahevitra amin’ity andiany ity ny hoe, « GovTech, manavao ny fomba fiasan’ny fitantanam-bola amin’ny alalan’ny niomerika ».
Tafiditra ao anatin’ny fihaonana isan-taona iarahan’ny Banky iraisam-pirenena sy ny Tahirimbola iraisam-pirenena (FMI) ary ny firenena mpikambana ao anatiny, ny New Economy Forum. Hotontosaina ny zoma 17 oktobra 2025 ho avy izao izany, any Washington, Etazonia. Firenena telo no voafantina ho an’ny GovTech amin’ity taona 2025 ity. Finlandy, Bresil ary Madagasikara, amin’ny alalan’ny Fadintseranana malagasy, nasaina manokana amin’ny maha Fitantanandraharaham-panjakana filamatra azy amin’ny fampiasana ny haranitantsaina artifisialy (IA) aty Afrika. Ny tale jeneralin’ny Fadintseranana malagasy, Zafivanona Lainkana Ernest, no hanazava mahakasika ny fanavaozana amin’ny fampidiram-bolam-panjakana entin’ ny ladoany malagasy.
Hizarany ny traikefa malagasy amin’ny fanavaozana ny fomba fiasan’ny Fadintseranana amin’ny alalan’ny niomerika, ny fampiasana ny haranitantsaina artifisialy, entina hanatsarana ny fanombanana ny ambana, ary ny famoronana ny Foibe faratampony mahakasika ny antontam-baovao sy ny haranitantsaina artifisialy (Cedia), izay ivontoerana voalohany aty Afrika.
Haban-tseranana amerikanina
Nanomboka ny alatsinainy 13 oktobra teo ny fivoriambe isan-taona iraisan’ny Banky iraisam-pirenena sy ny FMI any Washington DC, Etazonia. Manatrika any daholo ny firenena mpikambana ao anatin’ireo mpamatsy vola iraisam-pirenena mahazatra ireo. Anisan’ny dinihina ny toekarena maneran-tany ankapobeny ny fahamarinan-toerana ara-bola ary ny fampandrosoana ny maneran-tany. Anisan’ny zava-dehibe tena hisian’ ny ady hevitra ny mahakasika ny haban-tseranana ampiharin’i Etazonia amin’ireo firenena manondrana entana any aminy. Eo koa ny fiatrehana ny fiovan’ny toetr’andro. Hifarana amin’ny 18 otkobra ity
fotoana ity.
Njaka Andriantefiarinesy
French