Niakatra avo telo heny ny hetra alaina amin’ny zava-pisotro labiera nanomboka ny taona 2020 hatramin’ity 2025 ity. Tafakatra 850 Ar isaky ny litatra raha 290 Ar/l izany teo aloha, izany hoe nisy fitomboana 293%. Vokany, tsy maintsy nampiakarina ny vidiny nefa tsy takatry ny fahefa-mividin’ny mpanjifa intsony.
Manoloana ireo, tandindonin-doza ny lalam-pamokarana malagasy, satria ahitana asa raikitra miisa 3 700, tantsaha mpamokatra 20 000, mpaninjara 350, toeram-pivarotana 25 000, mpiara-miasa samihafa 1 100. Izany hoe, manodidina ny 55 000 ny fianakaviana mivelona sy misehatra amin’ity lalam-pihariana ity, iharan’izao fampiakarana ny hetra izao.
Mitsinjo hatrany ny kalitaon’ ny vokatra ny orinasa Star, ka tsy azo ihodivirana ny fampiakaram-bidy. Sahirana ny mpiara-miombon’antoka, satria tsy mandeha ny tsena sy ny varotra.
Fanovana ny hetra
Raha ny fanazavana, manaiky ny Star fa ilaina ny fampidiran-ketra. Saingy miantso ny governemanta ity orinasa ity hiverina hifampidinika mahakasika ny politikan’ny hetra ampiharina. Takiny ny hampidinana ny Droit d’accises amin’ny labiera. Satria izay ihany no hany vahaolana ahahafahan’ny rehetra mividy ny vokatra, sady mitsinjo ny indostria eto Madagasikara. Tsy nisitraka tombontsoa manokana ny Star hatramin’izay ny Star, saingy mitaky ny hiarovana ny indostria malagasy.
Njaka A.
French