Hiampy 43,5 MWc ny herinaratra eto amin’ny Tambajotra iraisan’Antananarivo (RIA) amin’ny faran’ity volana janoary ity. Herinaratra vokarin’ny tobim-pamokarana mandeha amin’ny masoandro efatra vao naorina, dia Ambatomirahavavy, Ambohidrano Ilafy, Mangatany ary Ampangabe.
Nanamafy izany ny minisitry ny Angovo sy ny Akoran’afo, Ralitera Ny Ando Jurice, nandritra ny fandaharana manokana tao amin’ ny fahitalavi-pirenena, ny talata teo. “Efa vonona hanampy manontolo ny ao amin’ny RIA ireo tobim-pamokarana mandeha amin’ny herin’ny masoandro ireo amin’ny faran’ity volana ity,” hoy izy. Anisan’ny fepetra maika noraisin’ny fitondram-panjakana hanamafisana ny famokarana herinaratra eto Antananarivo ny fampandehanana ireo fotodrafitrasa ireo. Nilaza ihany koa ny minisitra fa nandeha miaraka amin’izany ny fanarenana ireo toby famokarana herinaratra mandeha amin’ny solika tantanan’ny Jirama. “Efa amboarina tsikelikely ireo foibe mba hiverina amin’ny tanjany feno,” hoy hatrany izy.
Famatsiana
Marihina fa efa mamokatra 13,5 MW amin’izao fotoana izao ny toby CTA II ao Ambohimanambola. Kendrena ny hahatratra indray ny tanjany feno 24 MW alohan’ny faran’ ny volana. “Miroso ny asa fanamboarana any an-toerana”, hoy ny fanazavany. Etsy ankilany, amboarina ihany koa ny toby Aksaf, izay kasaina hampiakatra ny famokarany ho 60 MW, raha 47 MW izany amin’ izao. Mahakasika ny famatsiana herinaratra any amin’ny faritra, nanambara ny minisitra fa amboarina ireo milina mpamokatra herinaratra simba. “Nividy sy nampiditra milina vaovao koa ny fanjakana ho fanamafisana maharitra ny famokarana nasionaly”, hoy izy nanome toky. Nohamafisiny anefa fa tsy mijanona amin’ny famokarana irery ny vahaolana. “Rohy iray manontolo ny herinaratra, manomboka amin’ny famokarana ka hatramin’ny fizarana sy ny fitaterana”, hoy ny minisitra Ralitera Ny Ando Jurice.
Henintsoa
French