Notanterahina omaly, tetsy Mahamasina, ny fifanakalozan-kevitra eo amin’ny fanjakana sy ny sehatra tsy miankina. Dinika natao handraisana ny hevitr’ireo mpandraharaha entina hanatsarana ny sehatra misy azy. “Fotoana hamoaboasana miaraka ireo sakana sy olana mitambesatra amin’ ny fampandrosoana ny indostria, ny orinasa, ny fandraharahana toy ny olan’ny famokarana, ny angovo, ny fiofanana, ny filana fotodrafitrasa ny dinika toy izao”, hoy ny minisitry ny Fampiroboroboana ny indostria sy ny fampivelarana sy ny sehatra tsy miankina, Rasoarahona Andry, tamin’ny lahateniny. Tafiditra ao anatin’izany ny olan’ny fitantanana, ny hetra, ny fahasarotan’ny fahazoana famatsiam-bola, ny olan’ny angovo ary koa ny fitaterana. Araka izany, hojerena ireo laharam-pahamehana azo tanterahina ao anatin’ny fotoana fohy sy ny paikady apetraka hanatsarana ireo vina lavitra ezaka. Notsindriny manokana fa hamafisina ny fifanakalozan-kevitra efa nisy hatramin’izay sy ny hitadiavam-bahaolana miaraka ny fifanakalozan-kevitra toy izao ho fampiroboroboana ny sehatra tsy miankina.
Drafitrasa
Tafiditra ao anatin’ny fanomanana ny fihaonambe ara-toekarena ny dinika natao. “Andrasana anatin’izao ny fanatanterahana ireo vahaolana naroso ho fanatsarana ny sehatry ny fandraharahana”, raha ny fanazavan’ny filohan’ ny sendikan’ny indostria eto Madagasikara (Sim), Rasamimanana Tiana. Nilaza kosa ny tale jeneralin’ny sehatra tsy miankina eo anivon’ny MIDSF fa ainga vao amin’ny tontolon’ ny fandraharahana ny fanavaozana misy amin’izao fotoana. Hisy, araka izany, ny fanaraha-maso ny fanapahan-kevitra raisina mba hahafahana manome vahaolana azo tsapain-tanana sy maharitra ho an’ny filan’ny sehatra tsy miankina, ary hanamafisana ny anjara asany amin’ny fampandrosoana ara-toekarena ny firenena.
Henintsoa
French