Nirefotra ny basy teny amin’ny kaominina Ankaraobato, ny alin’ny alakamisy 15 janoary teo. Tokantranona mpamongady iray norobain’ny jiolahy.
Nitrangana fanafihana mitam-piadiana tao amin’ny fokontany Ankadinandriana, kaominina Ankaraobato, ny alin’ny alakamisy 15 janoary teo. Niditra an-keriny tao amin’ny trano nisy ny fianakavian’ilay mpivarotra amina “grossiste” ireo olon-dratsy. Nitondra fitaovam-piadiana ny iray tamin’izy ireo ka nanapoaka basy. “Nahazo vola ireo mpanao ratsy ireo saingy tsy fantatra ny isany”, hoy ny fanazavan’ny loharanom-baovao avy eny an-toerana. Natahotra ny ainy ny tompon-tsena lasibatra ka tsy sahy nanohitra nandritra ny tranga. Nifanenjehan’ny mpitandro filaminana izay nahare ny zava-nisy ireo mpanao ratsy. Tafaporitsaka ireto farany ka nanao ny angom- baovao rehetra ny polisy miasa ao an-toerana taorian’ny fanafihana.
Voasambotra
Nanohy ny asany ny tomponandraikitra eo anivon’ny polisim-pirenena, ny maraina. Lehilahy miisa telo voasambotra. Sarona teo am-pisotroana taorian’ny fitsikilovana mangingina nataon’ny mpanao fanadihadiana ny roa, araka ny loharanom-baovao. Nosamborina tao amin’ny trano fonenany kosa, ny iray. Atao famotorana ireo olona ahiana ho anisan’ny nandray anjara tamin’ity tranga fandrobana ity ireo. Tsy mbola nahazoam-baovao ny mombamomba ireo nitondra ny vola nandositra izay voalaza fa roa lahy. Mitebiteby noho ny fisiana tranga fanafihana mitam-piadiana ny mponina eny an-toerana ka miantso ny mpitandro filaminana hanamafy ny fanaraha-maso sy fisafoana amin’ny alina. Andrasana ny tohin’ny raharaha.
Tsiferana R.
French