Maromaro ny fifanaovan-tsonia fiaraha-miasa eo amin’i Madagasikara sy i Afrika Atsimo. Firenena voalohany fanafarantsika entana, amin’ny alalan’ny fifanakalozam-barotra malalaka tsy tataovan-ketra (Zlecaf).
Noraisin’ny filoha afrikanina tatsimo, Cyril Ramafosa, tao amin’ny trano fonenany, any Mahlamba Ndlopfu, Pretoria, ny filohan’ny Fanavaozana ny Repoblika, ny kolonely Randrianirina Michaël, ny zoma 16 janoary teo. Fitsidihana arakasa ity nataony ity. Nisy ny fanaovan-tsonia fifanarahana fiaraha-miasa eo amin’ny tany roa tonta, ka anisan’izany ny hiverenan’ny fitaterana ana habakabaka eo amin’i Madagasikara sy i Afrika Atsimo. Tsiahivina fa efa nisy ny zotra ana habakabaka mampifandray mivantana an’Antananarivo sy Johannesbourg, niantohan’ny Air Madagascar, saingy niato nanomboka ny nisian’ny valanaretina Covid-19, tamin’ny taona 2021.
Eo koa ny fifanarahana ara-barotra amin’ny alalan’ny fitaterana an-dranomasina sy ny fiaraha-miasa amin’ny sehatry ny siansa sy ny teknolojia niomerika. Nohamafisina ny fiaraha-miasa amin’ireo tsenam-paritra toy ny Sadc sy ny Vondrona afrikanina (UA).
Efa tamin’ny taona 1994 ny fifandraisana ara-diplaomatika eo amin’ny firenena roa tonta. Firenena matanjaka indrindra ara-toekarena aty Afrika i Afrika Atsimo ary maro ny sehatra azo iaraha-miasa amin’izy ireo.
Voalohany i Afrika Atsimo
Eo amin’ny fifanakalozana ara-barotra, maro ny entana hafaran’i Madagasikara any amin’ity firenena ity. Sehatra iray azo araraotin’ny roa tonta ny fisian’ny fifanarahana ara-toekarena, ny Faritra malalaka ara-barotra aty Afrika (Zlecaf), tsy hitataovana haba amin’ny fifanakalozana. Avy any Afrika Atsimo ny 48% ny entana afaran’i Madagasikara aty amin’ny firenena afrikanina, araka ny antontanisan’ny Banky iraisam-pirenena, ho an’ny taona 2024. Avy any Maorisy ny faharoa, mahatratra ny 27,4 % ary Egypta ny fahatelo (14%).
Njaka Andriantefiarinesy
French