Nifanakalo hevitra momba ny zava-misy sy nametraka ny vinan’ny toekarem-pirenena izay ahitana vesatra ara-ketra sy ny fitotongan’ny fitomboan’ny toekarena ny Tahirimbola iraisam-pirenena (FMI) sy ny sehatra tsy miankina, andro vitsy lasa. Mandalo fotoan-tsarotra sy manan-danja eo amin’ny tantaran’ny toekarena i Madagasikara amin’izao fotoana, na eo aza ny fitomboan’ny tahan’ny fanondranana, mihena ny harinkarena faobe, raha ny nambaran’ny solontenan’ny FMI. Notsindriny fa zava-dehibe ny mihaino ny olan’ny sehatra tsy miankina sy mampiditra izany ao anatin’ny politikam-pampandrosana ny toekarena. Mahakasika ny rafitry ny orinasa afakaba, nanazava ny FMI fa tsy manohitra izany, saingy miantso hanaovana fanadihadiana lalina sy hentitra momba ny tombony sy ny fatiantoka aterany. Nasongadiny manokana ny olana momba ny fitantanana sy fanaraha-maso ireo orinasa afakaba sandoka. Ankilany, nilaza ny FMI fa mila hajaina sy omen-danja ny lafiny sosialy sy ny maha olona izay heverina fa andry lehibe amin’ny fampandrosoana.
Toekarena
Manana anjara toerana lehibe eo amin’ny toekarena malagasy ny orinasa afakaba. Nilaza ny Fivondronan’ny orinasa afakaba (GEFP) fa manintona sy manome asa maro ity rafitra ity. Maherin’ny 60 000, hoy izy, ny asa miankina amin’ ny Agoa. Na izany, manaitra ny fanjakana ny GEFP mahakasika ny trosa maherin’ny 100 miliara Ar izay mbola tsy voaloa hatramin’ny taona 2019. Ity farany izay mampihisatra ny fihodonan’ny orinasa. Araka izany, mangataka fihaonan’ny telo tonta ny sehatra tsy miankina.
Henintsoa
French