Andravoahangy : Lehilahy 40 taona maty tampoka

Lehilahy iray, tokony ho 40 taona, maty tampoka tetsy amin’ny tsenan’Andravoahangy, omaly maraina. Mbola hitan’ny olona nandehandeha teny an-toerana izy talohan’ny fotoana nitrangan’ny loza. Naka aina sy nipetraka ary natoritory teo amin’ny sisin-dalana izy. “Vetivety teo, niantsambotra izy ary toa ireny olona miala aina ireny”, hoy ireo nanatri-maso teny an-toerana. Nojerena sy notsapaina, efa tsy nisy aina intsony taorian’izay. Nampandrenesin’ny fokonolona ny mpitandro filaminana sy ny sefo fokontany teny an-toerana. Tonga teny an-toerana ny polisim-pirenena taorian’ny antso, nijery ny zava-misy sy nanao ny fanadihadiana. Taorian’izay, nalain’ny avy ao amin’ny BMH ny razana, ary naterina teny anivon’ny tranom-patin’ny HJRA Ampefiloha. Tsy mbola fantatra ny fianakaviany tamin’ny fotoana nialan’ny razana teny an-toerana.
Raha ny fanazavan’ny olona teny amin’ny manodidina, mpisotro toaka matetika io lehilahy namoy ny ainy tampoka io. Mbola hitan’ny olona mamo ihany koa ny tenany afako­maly alina, talohan’ny tranga. Mpikarama mibata entan’olona eny amin’ny tsenan’Andravoahangy izy io, raha ny fanaza­vana voaray hatrany. Nambaran’ny olona hatrany fa tsy manambady ary tsy manan-janaka izy io.

Mino