Havoaka rahampitso ny boky « Le régime de transition à Madagascar de 1972 à 1975 ». Niarahan’i Lahiniriko Denis Alexandre sy Rasoloarison Lalasoa Jeannot nanoratra izy ity, hampahafantarina ao amin’ny Tranombokim-pirenena Anosy, amin’ny 10 ora maraina. Samy mpahay tantara ny mpanoratra, izay nandalina ny fiainam-pirenena tamin’ny vanim-potoana maro nolalovana, indrindra ireo nafampana. Ny mpanoratra Hobiana Andrianimerina no hiatrika ny fampahafantarana.
Nifarana ny alahady teo ny kerimesy miaramila, tetsy amin’ny Barea Mahamasina. Fotoana nanehoana ireo karazan-javakanto isam-paritra ihany koa izany, ankoatra ny sehatra lehibe ho an’ny mozika. Tsara ny tolotra, saingy somary vitsy ireo mpitsidika noho ny tsy fahampian’ny fampahafantarana mialoha.
Hitohy ny « Podium ». Efa nampiditra ny fetim-pirenena ireo sehatra maro nanamarihana ny « Fetin’ny mozika ». Hitohy manerana ireo distrika sy faritra maro ny « Podium », ho fampifaliana ny vahoaka. Mpanakanto maro no hifandimby amin’ireo sehatra izay nomanina, ka anisan’ny lehibe ny eto Antananarivo, ny 25 jona izao, eo Anosy. Efa mahazatra koa ny tolakandron’ny 26 jona, aorian’ny matso eo amin’ny Kianjan’i Mahamasina.
French