Hotanterahina eto Analamanga, ny 1 hatramin’ny 9 aogositra izao, ny fiadiana ny tompondakan’i Madagasikara, taranja basikety, sokajy latsaky ny 14 taona, lahy sy vavy. Ekipa 48 lahy sy 41 vavy no hifaninana amin’izany.
Kianja 3 eto Antananarivo dia ny eny amin’ny Kianja mitafon’i Mahamasina sy Kianja Barea eo ivelany roa no handraisana ny fifaninanana nasionaly U14, raha toa ka saika natao tany Mananjary izany. Ligy 17 no hahatonga solontena, araka ny fanazavan’ny avy eo anivon’ny Federasionina malagasin’ny basikety, tamin’ny alalan’ny filoha lefitra Ramanarivo Alain. Nandritra ny valandresaka ho an’ny mpanao gazety, omaly, teny amin’ny Lapan’ny tanànan’Antananarivo no nanambarany izany. Miara-misalahy amin’ny fandraisana ity fifaninanana ity ny FMBB sy ny ligin’Analamanga. Manohana azy ireo ny kaominina Antananarivo Renivohitra amin’ny fanomezana kianja hilalaovana. Voatendry ho filohan’ny fikarakarana ny fifaninanana kosa Ramahandrimanana Hasina, izay nanazava ny fizotry ny fifaninanana. Haharitra 5 andro eo ny fifanintsanana isam-bondrona. Miroso amin’ny ampahavalon-dalana sy ny dingana farany aorian’izay. Ao amin’ny Kianja mitafon’i Mahamasina no hanatanterahana ny famaranana. Ho sarotiny amin’ny fanaraha-maso amin’ny resaka hala-taona ny mpikarakara. Miara-miasa akaiky amin’ny minisiteran’ny Fanabeazam-pirenena izy ireo hanaovana ny sivana amin’ireo mpandray anjara. Hohamafisina mafy koa ny fandriampahalemana, indrindra amin’ny savorovoro amin’ny hala-jaza misy amin’izao fotoana izao. Antony nahatonga ny mpikarakara hampifanakaiky ny kianja hilalaovana izany. Aorian’ity fifaninanana ho an’ny U14 ity, ny sokajy Vétérans indray no hiditra an-tsehatra, araka ny tohin’ny fandaharam-potoana.
Mi.Raz
French