Nijery ny zava-misy teny anivon’ny tsenan’Anosizato ny ben’ny Tanànan’Antananarivo sy ny mpiara-miasa aminy, omaly maraina. Noho ny fisian’ny krizy, nohalefahiny ny fandoavana ny haban-tsena mbola tsy voaloan’ireo mpivarotra eny an-toerana.
Maro ny fangatahana nataon’ireo mpivarotra nandritra ny fihaonana. Nitaky ny fitaovana hanadiovana sy hanalana ny fako mitoby eny anivon’ny tsena izy ireo. Nitaky ny hampidirana ireo mpivarotra amoron-dalana ho ao anatin’ny tsena ihany koa. Teo koa ny hanamorana ny fandoavana ny haban-tsena sy hetra izay mampisy olana betsaka eo anivon’ny tsena sy ireo mpivarotra, araka ny fanazavana voaray. “Mba hipetraka ho tsena manara-penitra madio sy milamina toy ny tsena rehetra ny ety aminay”, hoy ny filohan’ny tsena Anosizato, Mamitahiana Felicien Jacquis.
“Mba hahafahana mahita ny lesoka tokony harenina sy hanohizana ny tsara vita amin’ny fitantanana ny tsena eto Antananarivo ny tanjon’ ny fidinana ifotony”, hoy ny ben’ny Tanànan’Antana-narivo Renivohitra, Andriantsitohaina Naina. Marihina fa nahafa-po ireo mpivarotra ny valin-tenin’ny ben’ny Tanàna. Anisan’izany ny famakiana ny lakandrano iray eny an-toerana. Mba hahafahan’ny rano mandeha tsara araka ny tokony ho izy. Teo koa ny fanalefahana ny fandoavana ny haban-tsena ho azy ireo.
Mino (mpianatra asa)
French