11 andro aty aoriana, tsy mbola navotsotr’ireo mpaka an-keriny izy telo mianadahy. Nihena ho 50 tapitrisa Ar ny sandan’ny takalonaina. Maty voatifitry ny zandary ny valo amin’ireo olon-dratsy tao Morarano Chrome.
Mitohy hatrany ny “opération Harato”, ataon’ny mpitandro filaminana ao amin’ny distrikan’Ambatondrazaka, momba ilay trangana fakana an-keriny tao Ambohimanarivo. Tafakatra valo ireo jiolahy maty voatifitra sy voasaringotra amin’ity raharaha ity, hatramin’izao. Nirefodrefotra ny basy tao amin’ny kaominina Bejofo, ny alin’ny alatsinainy hifoha talata teo. Lavon’ ny mpitandro filaminana ny roa lahy hafa, voarohirohy tamin’ilay raharaha fakana an-keriny. “Tsy fantatra raha natao fanadihadiana ireo olona voatifitra ireo. Mety ho karazana sarika am-pandriana koa anefa ny nahatrarana azy roa lahy ”, hoy ny loharanom-baovao iray ao an-toerana. “Omaly maraina vao hitan’ny fokonolona ilay vaovao. Taorian’io, napetraka ao amin’ny biraon’ny kaominina ireo vata-mangatsiaka miandry ny havany haka azy”, hoy hatrany ny mponina any an-toerana, loharanom-baovaonay.
Feno 11 andro no nakana an-keriny ireo telo mianadahy tao Ambohimanarivo. Tsy mbola navotsotry ny olon-dratsy hatramin’izao. Mazava ho azy, mitohy ny hetsika ataon’ny miaramila sy ny zandary any an-toerana. Tanjona ny fanavotana ny lasibatra sy ny famongorana ny asan-jiolahy sy ny trangana fakana an-keriny.
Mitohy ny fanadihadiana sy ny hazalambo rehetra, araka ny vaovao avy any amin’ny zandarimariam-pirenena. Tsiahivina, jiolahy enina no efa maty voatifitra tao Morarano Chrome sy Andranobe, distrikan’Amparafaravola, ny sabotsy lasa teo. “ Samy voasaringotra amin’ity asan-jiolahy ity avokoa ireo lavo.”, hoy ny mpitandro filaminana. “Tsy hijanona eo ny raharaha. Mbola hitohy amin’ny famantarana ireo rehetra voatondro nanao ity fakana an-keriny ity ny famotorana atao”, raha ny tatitra avy amin’ny mpanao fanadihadiana hatrany.
Efa nihena ho 50 tapitrisa Ar ny vola takin’ireo mpaka an-keriny ho sandan’ny takalonaina miisa telo. 200 tapitrisa Ar no niatombohan’ny fitakiana ny andron’ny fakana an-keriny.
Henintsoa Hani
French