Tafaverina amin’ny ray aman-dreniny, omaly, ny zazalahikely vao 7 taona, rehefa nalain’ny mpaka an-keriny teo an-tokotaniny tetsy Ambohidahy Ankadindramamy, ny 13 avrily lasa teo. Voasambotra ireo mpaka an-keriny roa. Nitady vola 10 tapitrisa Ar tamin’ny ray aman-drenin’ny zaza nalainy ireto jiolahy ireto. Nilalao irery teo an-tokontany io zaza io ny harivan’ny 13 avrily teo, tamin’ny 4 ora sy sasany, raha ny nambaran’ny rainy. Nalain’ny olon-tsy fantatra tamin’izany izy ka tsy hita popoka nanomboka teo. Nampandre avy hatrany ny zandary miasa ao an-toerana ny rainy. Niantso ny ray aman-drenin’ilay zaza ireo olon-dratsy nanomboka ny 14 avrily. Nitaky lelavola 10 tapitrisa Ar ho takalon’ny famerenana io zazalahy io .
Roa lahy voasambotra
Omaly, niantso indray ny ray aman-drenin’ny zaza ireo olon-dratsy. Nanambana ny hamono io zaza io izy ireo raha toa ka tsy voaefa ara-potoana ilay vola 10 tapitrisa. Nifanindry an-dalana tamin’izany, nanao fanadihadiana lalina ny mpitandro filaminana. Olona roa nahiana fatratra sarona tetsy Ankatso ka nosamborina. Natao famotorana izy roa ireto ka niaiky ny farany. Natondrony ny mpanao fanadihadiana ny toerana nanafenan’izy ireo ny zaza. Nafenin’izy ireo tao amin’ny tokantrano iray anatin’ny fokontany Antamohitra, Kaominina Ambohibao Antehiroka ilay zazalahy. Nentina natao fizahana fahasalamana izy. Karohina ireo mpiara-miombon’antoka tamin’ireto olona voasambotra ireto.
Tsiferana R.
French