Miavaka raha samy sekoly fanofanana miaramila ny sekoly miaramilam-pirenena na Semipi izay nankalaza ny faha-100 taonany tao Beravina – Fianarantsoa, omaly. Taninketsan’ny foloalindahy malagasy ny sekoly, araka ny nambaran’ny minisitry ny Fiarovam-pirenena, Jly Rakotoarijaona Josoa. Tsy fanofanana fotsiny. “Mamolavola olom-pirenena vanona eo amin’ny fomba fisainana hatramin’ny fitondrantena”, hoy izy. Notoloran’ny filoham-pirenena Rajoelina, sady filoha faratampon’ny Foloalindahy ny “épaulettes” ho an’ ireo mpianatra sangany amin’ ireo andiany 2022 – 2023 nandritra ny fandraisana azy ireo anatin’ny fiainana maha miaramila. Misy amin’ireo mpianatra sangany hanohy hanovo fahalalana amina sekoly miaramila “Lycée militaire de Prytanée” any Frantsa.
Tsiahivina fa niorina ny 25 mey 1923 tetsy Betongolo ny sekoly. Niova anarana im-balo, navadika ao Beravina Fianarantsoa, ny taona 1964. Mandray ankizy manodidina ny 50 isan-taona eo. Aorian’ ny fahazoana bakalorea, afaka misafidy ny hanohy fianarana amin’ny fampianarana ambony, na miditra amin’ny kilasy fanomanana ahafahana mifaninana hiditra amin’ny “Académie militaire” (Acmil), ireo mpianatra.
Tsiferana R.
French