Vita Sonia, omaly, teny amin’ny Lapam-panjakana Iavoloha, ny fanaovan-tsonia eo amin’ny fitondram-panjakana malagasy sy ny Compagnie générale de l’hydroélectricité de Volobe (CGHV), ao anatin’ny tetikasa “Volobe en Amont”. Famokarana herinatra amin’ny alalan’ny reniranon’Ivondro. Araka izany, hamokatra herinaratra 750 Gwh isan-taona izany i Volobe ka hanana tanjaka 120 MgW. Olona 2 tapitrisa kosa hisitraka ny tetikasa.
Hampihodina sy hampiroborobo ny toekaren’ny firenena ity vita sonia ity, noho izy hanampy amin’ny famoronana asa isan-karazany. “Hita tokoa ny fahanteran’ny fitaovana mamokatra herinaratry ny orinasa Jirama eto Madagasikara. Natao laharam-pahamehana ny famokarana herinaratra azo avaozina toy izao”, hoy ny filoham-pirenena, Rajoelina Andry, nandritra ny kabariny. Mitotaly 442 MgW ny herinaratra hovatsian’ireo orinasa lehibe eto Madagasikara. 66 MgW amin’izany avy amin’ny orinasa Jirama. 192 MGW avy amin’ny tetikasa “Sahofika”, 120 MgW kosa avy amin’i Volobe. Etsy ankilany, mbola maro ireo tetikasa ataon’ny fitondram-panjakana hamatsiana ny herinatra eto Madagasikara.
Angovo azo avaozina
Ankoatra izay, mbola hametraka toby famokarana herinaratra azo avy amin’ny masoandro (parc solaire) 37 isa ny fitondram-panjakana. Ka tanàna 37 isa hisitraka ity tetikasa ity alohan’ny faran’ny taona. Ao anatin’izany Amparafaravola, Tanambe, Marolambo, Ikongo, Ihosy, Nosy Varika, Vondrozo, Ambositra, Mahanoro, Bekily, sns. Tsy hisy intsony ny fampiasana solika ary ho tapitra ny fahatapahan-jiro.
Tsiahivina fa efa-taona niandrasana ny tetikasa “Volobe” ny mponina ao Toamasina, indrindra amin’ny famoronana asa sy fampihodinana ny toekarena.
Henintsoa Hani
French