Ramatoa roa niray tsikombakomba tamin’ny jiolahy nidoboka am-ponja ao Ankazobe, afakomaly. Anatin’ny fanohizana ny famongorana ireo jiolahy tompon’antoka tamin’ny doro trano nahafatesana olona tao Ambohitriniandriana, fokontany Anosikely, kaominina Ambolotarakely, distrika Ankazobe, ny zandary. Voasambotra ny faran’ny herinandro teo ny vehivavy roa voalaza ho mpiray tsikombakomba tamin’ireo olon-dratsy nahavanon-doza. Tsy vitan’ny nampiantrano, mbola namatsy sakafo ireo jiolahy izy mirahavavy ireto, araka ny loharanom-baovao. Niara-niasa akaiky tamin’i Lemizana sy Ndrina, izay jiolahy atidoha niketrika ary nahatonga io fandoroana tanàna tao an-toerana io ireto tra-tehaka ireto. Manome vaovao ireo jiolahy ahafahan’izy ireo miala amin’ny paikady apetrak’ireo mpanara-dia koa ireto vehivavy roa ireto. Natao fanadihadiana, niaiky heloka ireto farany. Niakatra fampanoavana ny raharaha ka izao niafara amin’ny fihazonana azy ireo am-ponja izao.
Tsiferana R.
French