Voasambotry ny zandary ny tovolahy iray 12 taona, nanolana zazavavy vao 8 taona, zanaky ny mpampiasa azy , afakomaly.
Tratra ihany! Noraisim-potsiny ny zazalahy nanolana sady nandrahona ho faty ny zazavavy 8 taona zanaky ny mampiasa azy tao Anjiajia, kaominina Ankerika, distrikan’Antsohihy, afakomaly. Mpiandry ombin-drain’io zazavavy io izy, niasa tao amin’izy ireo nanomboka ny volana oktobra 2022 teo. Noho ny fifanarahana nataon’ny roa tonta, isaky ny herintaona vao mandray karama ilay mpiandry omby. Miara-mipetraka amin’ny mpampiasa ao an-trano kosa anefa izy. “Tsy tao an-trano tampoka ny ray aman-drenin’ny zaza, noho ny fitadiavana ka nanararaotra ilay zazalahy, ny alin’ny 9 mey hifoha 10 mey teo”, hoy ny fanazavan’ny zandary, kaomandin’ny vondron-tobim-paritra ao Antsohihy. Nandadizan’ity zazalahy ity moramora tao amin’ny fandriany ilay zazavavy ka nohararaotiny. “Norahonany tsy hilaza na amin’iza na iza ilay zaza taorian’izay”, hoy ny zandary. Kinanjo, niverina ny ray aman-drenin’ny zaza ny ampitso. Nahatsikaritra ireto farany fa tsy salama ity zanany. Nitantara ny nanjo azy tamin’ireo ray aman-dreniny izy. Nentina nozahana, voamarin’ny mpitsabo fa niharan’ny fanolanana ka simba tanteraka io zazavavy io.
Nirifatra nandositra
Vokatr’io zava-nisy io, nitsoaka ilay zazalahy mpiandry omby. Nitory teny anivon’ny biraon’ny mpitandro filaminana ny ray aman-drenin’ilay zaza niharan’ny filan-dratsy. Niroso tamin’ny fikarohana ireto farany. Iray volana latsaka aty aoriana, fantatra fa miriaria tao Ambodimahabibo, fokontany Matsaboribe, kaominina Ampandriakilandy, ilay nahavanon-doza. Nidina ifotony, tra-tehaka izy ka nentina natao famotorana. “Efa mihoatra ny 12 taona io mpanolana io raha ny endriny ivelany sy ny firafitry ny vatany”, hoy ny zandary. Notsindrin’ny kaomandin’ny vondron-tobim-paritra ao an-toerana fa tsy azo leferina velively ny fanararaotana ara-nofo tahak’izay nitranga tao an-toerana ity. Hatolotra ny fampanoavana tsy ho ela ny raharaha.
Tsiferana R.
French