Nandrasan’ny olon-dratsy kendry tohina teo akaikin’ny trano fonenany. Maty voatifitra ny lehilahy iray, mpanao vato tao Andohan’Ilakaka, afakomaly hariva.
“Avy nanao afera toy ny fanaony izy ny hariva ka nikasa hody. Efa nisy niandry tsy lavitra ny trano fonenany anefa izy ka notifirin’ny jiolahy avy hatrany”, hoy ny zandary. Vao nidaraboka tamin’ny tany, mbola nozerain’ ireo olon-dratsy famaky ny lohan’ilay lasibatra. Mbola norobaina ny vola sy ny basy iray mialoha ny nandosiran’ ny olon-dratsy. Nanara-dia niaraka tamin’ny fokonolona ny mpitandro filaminana. “Nifarana teo amin’ny 9 km atsinanan’ny toerana nitrangan’ny famonoana ny dia.
Lehilahy iray naneho fihetsika hafahafa ary nahitana ra ny akanjony”, araka ny fanamafisan’ny zandary
ao an-toerana. Nentina natao fanadihadiana ilay voasambotra.
Tora-bato
Nokasain’ny fokonolona halaina an-keriny tao amin’ny zandary ilay lehilahy atao fanadihadiana. Nidina ifotony nifampiresaka tamin’ny olobe tao an-toerana ny lehiben’ny mpitandro filaminana. Tetsy ankilany, “Leo izahay, matetika lasibatra ka aleo hatao fitsaram-bahoaka”, hoy ny fokonolona, omaly maraina.
Raikitra ny tora-bato teo amin’ny biraon’ny zandary. Voatery nanao fampitandremana tamin’ny alalan’ny tifi-danitra ny mpitandro filaminana. Tsy nifarana ny fifandonana teo amin’ny zandary sy ny fokonolona raha tsy tamin’ ny 11 ora sy sasany atoandro. “Niparitaka ihany ny fokonolona ny farany”, hoy ny zandary.
Tsiferana R.
French