Raisina eny anivon’ny sekoly ireo atleta sy mpandray anjara mandritra ny lalao ara-panatanjahantena iraisan’ny minisitera « Asief 2023 » any Toamasina, ankehitriny. Tsy mendrika izany fa tokony ho raisina any amin’ny trano fandraisam-bahiny izy ireny, raha ny fanazavana.
Anisan’ny mpilalao sy mpandray anjara mitondra fanamarihana amin’ny fizotry ny Asief 2023 any Toamasina ny avy amin’ny taranja “Law tennis”. Nokianin’izy ireo ny fomba fikarakarana sy fikirakirana, ary ny fomba fandraisana amin’ny lalao. Lalao izay tanterahina any Toamasina, nanomboka ny voalohan’ny volana hatramin’ny 12 aogositra ho avy izao. Nahatratra 20 000 ny vahiny tonga any an-toerana, notsinjaraina tamin’ny ivontoerana 34. Nilaza ny mpilalao fa tsy tokony hapetraka any amin’ny sekoly ny atleta, fa any amin’ny trano fandraisam-bahiny. “Hiteraka fahasahiranana ho an’ny mpianatra sy ny ray aman-drenin’ny mpianatra ( Fram) ny fametrahana ny vahiny eny anivon’ny sekoly”, hoy hatrany izy ireo. Mandoa “droit d’engagement” ny rehetra, nefa mbola takina hofana kianja sy vola ihany koa. Nandoavana 220 000 Ar ohatra ny hofan’ny harato ho an’ny tennis. Ankoatra izay, tsy tokony ho natao amin’ny vanim-potoana be orana ny lalao.
“Tsy nahazo nandray anjara ireo tsy nanaraka fepetra sy nanala baraka ny mpiasam-panjakana”, raha ny fanazavan’ny filoha nasionalin’ny Asief, Andrianarison Jean aimé na John Love. Hatramin’ny niatombohan’ny fifaninanana, tsy nisy andro maina fa oram-be nikija hatrany. Nitarika fahasahiranan’ny maro izany. Vokany, nisy ireo mpandray anjara narary. Tsy afaka nifaninanana intsony ny ankamaroan’izy ireo. Dibo-drano i Toamasina, mikorontana ny fifamoivoizana, tsy mihato ny fahatapahan’ny herinaratra, tsy mandeha araka ny fandaharam-potoana ny fifaninanana.
Fampanantenana kianja
Nialoha ny taona 1985, nahatratra 35 ny kianja fanaovana baolina kitra tao Toamasina Renivohitra, azon’ny rehetra nilalaovana. 12 ny kianja ho an’ny basikety sy handball ary volley-ball. Taorian’ny taona 1985, nihena 11 ny kianja ho an’ny baolina kitra fa nanamboatra kianjan’i Barikadimy ny mpitondra ankehitriny. Lasa kianja manara-penitra izany amin’ izao fotoana izao. Nalain’ireo tomponandraki-panjakana tany an-toerana an-keriny izany, toy ny kianja fanaovana basikety ankalamanjana rehetra 12. Tsy nisy fanapotehana sy fanamboarana kianja, ny fitondran’i Zafy Albert. Kianja fanaovam-baolina efatra no nanorenana trano nandritra ny fitondran’ny filoha teo aloha, Ravalomanana Marc. Tao Salazamay sy Ambohijafy ary tsy nisy fanamboarana kianja vaovao tamin’izany. Nanjaka ny resa-bola tamin’ny fitondrana Tetezamita ka novidian’ny mpanambola izy ireny. Toy ny tao Morarano, Ambalakisoa, Salazamay atsimo. Nihena 5 sisa ireo kianja filalaovan’ny tanora nandritra ny fitondrana teo aloha, Hery Rajaonarimampianina. Tsy nisy fandravana na fanamboarana kianja vaovao ihany koa. Ny fiverenan’ny filoha ankehitriny, Rajoelina Andry, nanatsara ny kianja ho manara-penitra tao Barikadimy izy. Navadika hanaovana “Building” mora ny kianja fanaovam-baolina tany Ambohijafy “terrain Lemalande Eric”. Mbola tany, fotaka no hita any. Nampanantena ny filoha fa hanaovana kianja mitafo manara-penitra “Arena Sport” ny kianja kaominaly. Hamboarina ho kianja manara-penitra ny eo amin’ny lisea teknika sy ny ao amin’ny Crjs. Mbola resabe koa izany.
Nodinihina sy notapahina indroa
Fahombiazana ho an’ ireo tomponandraiki-panjakana avy amin’ny Tgv/Mapar sy ny mpikambana anivon’ny filankevitra kaominaly voafidy izany, raha ny fanazavana, nandritra ny fivoriana tsy ara-potoana voalohany, nataon’ny filankevitra kaominalin’ny kaominina ambonivohitr’i Toamasina. Naharitra telo andro ary nifarana ny 12 marsa 2021, teo ny fivoriana. Nodinihina nandritra izany, ny fepetra raisina mikasika ny fanapotehana sy fandravana kianja fanaovam-baolina. Hijerena ny tetikasan’ny filoham-pirenena momba ny fanamboarana ireo kianja mitafo manara-penitra, handraisana basikety, handball, volley, tenisy ary haiady isan-karazany. Hisy ihany koa ny toerana fisakafoana sy fanaovana fampisehoana ara-kolotoraly ary ireo toeram-pivarotana isan-karazany. Tsy nisy afa-tsy mpikambana 12 amin’ny filankevitra 19 no tonga nivory. Nandray vola 500 000 ariary izy ireo, raha ny loharanom-baovao tamin’izy ireo ihany. Tanjona ny handaniana ireo notsipahin’ny filankevitra kaominaly nandritra ny fivoriana ara-potoana faharoa, ny desambra 2020. Nametraka fitoriana eny anivon’ny fitsarana misahana ny ady ifanaovana amin’ny fanjakana ny prefet-n’ i Toamasina. Vokany, naverina nofidiana sy voafidy indray izany.
Nanatontosa : Sajo
French