Tsy ampy ny vokatra eto an-toerana : hanafatra katsaka 45 000t ny mpandraharaha

Mbola ambany ny famokarana katsaka eto Madagasikara kanefa tsy mitsaha- miakatra ny vidin’izany eny an-tsena. Mandroso vahaolana amin’ny fanafarana katsaka ireo mpiantsehatra amin’ny fiompiana.

Misedra olana ny tontolon’ny fiompiana. Tsy ampy sady lafo ny ka­tsaka eny an-tsena ka miantraika mivantana amin’ny fiharian’ny tantsaha. Vokany, na­hena hatramin’ny 50% ny biby fiompiny ny ankabeazan’ny tantsaha, misy ireo nanajanona izany mihitsy. Manoloana izay, nandroso vahaolana ny « Malagasy professionnels de l’élevage (MPE) » sy ny « Inter­profession aviaire de Mada­gas­car (IPA) ». Hanafatra katsaka tsy voatoto 45 000t ireto mpandraharaha ireto, amin’ny alalan’ny minisiteran’ny Fam­bolena sy ny fiompiana sy ny minisiteran’ny Fampiroboro­boana ny indostria sy ny varotra ary ny fanjifana. Atao izao hamenoana ny banga amin’ny filan’ny mpisehatra tsirairay ka hahafahan’ny vidim-bokatra ho takatry ny rehetra.
«Mangataka amin’ny minisiteran’ny Toekarena sy ny fitantanam-bola izahay ny hanalana ny haban-tseranana 10% amin’ireo katsaka hafa­rana ireo », hoy ny fanazavan’ ny sekretera jeneralin’ny IPA , Rakotondrandria Mira, omaly, tetsy Nanisana. Notohizany fa hojifaina 1 500Ar ny kilaon’ ireo katsaka rehefa tonga eto an-drenivohitra. Vahaolana maharitra ny fampiakarana ity seha-pamokarana ity eto amintsika. Manodidina ny 0,7t ka hatramin’ny 2,5t/ha ny vo­katra katsaka eto Madagasi­kara. Tokony hahatratra 6t/ha izany raha ny toe-tany eto amintsika, antony hiantsoana ny tomponandraikitra hijery akaiky ity famokarana ity, hoy ny fanazavana voaray.

Simba
Akora fototra fampiasa ho an’ny sakafom-biby ny katsaka noho izy mameno ny 65% ny provandy. Miakatra 30 hatramin’ny 40 Ar isan-kerinandro ny vidin-katsaka. Ny volana jona teo, 1 800Ar ny kilao raha 1 000Ar izany ny volana jona 2021. Mihena ny famokarana noho ny fiovaovan’ny toetr’ andro. Misy ireo faritra mpamboly katsaka no nanova ny toeram-pamboleny ho lasa lojy, fary na vary. Fantatra fa manodidina ny 400 000t ny filàna ny katsaka. « Tsy ampy hatramin’ny 150 000t ny vokatra eto amintsika », hoy hatrany ny tomponandraikitry ny IPA.

Henintsoa Hani