Nitrangana fakana an-keriny zaza varira indray tao amin’ny fokontany Morarano, kaominina ambanivohitr’Ankilizato, distrikan’i Mahabo, faritra Menabe, afakomaly. Nalain’ny dahalo an-keriny teny an-trotroin-dreniny ny zazavavy iray taona sy tapany (zazakely mbola minono). Dahalo enin-dahy nirongo fitaovam-piadiana mahery vaika no tompon’antoka tamin’ ity fakana an-keriny ity. Niditra an-keriny tao an-trano ireo dahalo. Samy tsy nanampo na inona na inona izy mivady tamin’ny fotoana nahatongavan’ireo malaso. Tsy nisy resaka fa nosintonin’ny iray tamin’ireo olon-dratsy teny an-trotroin-dreniny ilay zazakely. Tsy afa-nanoatra izy mivady manoloana izany. Tsy mbola fantatra hatreto ny toerana nitondran’ireo malaso ity zazakely ity. Ranomaso, fitaintainana no niainan’ireo ray aman-dreniny manoloana izao fanafihana niharo fakana an-keriny izao. Manoloana izao raharaha izao, nandray ny andraikiny avy hatrany ny eo anivon’ny fikambanana Albinos Madagascar, tamin’ny alalan’ny filoha nasionaly, Soja Fulgence. « Miantso ny fandraisan’andraikitry ny mpitandro filaminana sy ireo tomponandraikitra eny ifotony voakasaika izahay mba hanao izay vita manoloana ity raharahara ity », hoy ny filohan’ny fikambanana. Nohamafisiny fa tsy hitazam-potsiny ny Albinos Madagascar fa hanaraka akaiky satria tandindonin-doza ny ain’ireo olona manana toe-tena varira sy tsy mba hiverenan’izao zavatra izao intsony. Ny zandary rahateo koa efa nanamafy fa tsy manana hery manokana, araka ny fieritreretan’ireo malaso azy, ny zaza manana toe-tena varira. Mitovy amin’ny olona rehetra ihany izy ireny fa tsy araka ny tsaho miely voizin’ny sasany.
J.C
French