Sambany ! Notokanana, omaly 28 septambra, tany Sakay Tsiroanomandidy, faritra Bongolava, ny Birao tokana ara-pambolena eto Madagasikara. Antom-pisiany ny hanohanana ny lalam-pihariana rehetra eo amin’ny sehatry ny fambolena.
Maromaro ny tolotra hita ao amin’ity birao tokana ara-pambolena any Sakay ity, toy ny tolotra mikasika ny fambolena sy ny fikarakarana antontan-taratasy samihafa manakaiky ny tantsaha sy ny mpamokatra. Miisa 10 ny sampandraharaha ao anatiny, ka anisan’izany ny fitantanana ny fitaovam-pamokarana, ny fananan-tany, ny fitantanan-draharaha, ny famatsiam-bola, ny hana-pamokarana (masomboly, zezika, fanafody, ….), ny toro-hevitra, ny tanimboly andrana sy fitaratra, ny fanodinam-bokatra, sns.
Voakasik’izany ny lafiny antontam-baovao samihafa, ny famatsiam-bola, ny famatsiana masomboly, ny zezika, ny fanafody, ny fitaovam-pambolena, sns. Tafiditra ao anatin’ny atrikasa namaritana ny tanjona hanatrarana ny fahavitan-tena ara-tsakafo, natao ny jona 2022, ny fametrahana ny Birao tokana ara-pambolena.
Fifampitokisana amin’ny tsy miankina
Nambaran’ny minisitry ny Fambolena sy ny fiompiana (Minae), Ramilison Harifidy, fa taratry ny fahavononan’ny fanjakana malagasy sy ny mpiara-miombon’antoka, ny orinasa Agrima, ny nahavitana nanangana ity Birao tokana ity. Manamarina ny fifampitokisana eo amin’ny governemanta sy ny tsy miankina rahateo izany.
Tanjona lavitr’ezaka ny hametrahana fotodrafitrasa toy ity any Sakay ity, manerana ny distrika 119 eto Madagasikara. « Fanamby goavana izany, saingy mila ny fahavononan’ny mpisehatra voakasika rehetra, ka anisan’izany ny tsy miankina, hanatrarana ny fahavitan-tena ara-tsakafo », hoy ihany ny minisitry ny Fambolena sy ny fiompiana.
Njaka Andriantefiarinesy
French